भांगरभूंय | प्रतिनिधी
थळाव्या लोकांची मागणी; पालिकेन नोटिसो धाडून लेगीत कसल्योच गरजेच्यो उपाय येवजण्यो नात
भांगरभूंय । प्रतिनिधी
मडगांवः मडगांवच्या गांधी मार्केट वाठारांतल्या कासा मिनेझीस इमारतीचो कांय भाग 2021 त कोसळिल्लो. ते उपरांतूय कांय इमारतींचे स्लॅब कोसळप चालूच आसा. मडगांव पालिकेन नोटिसो धाडून लेगीत आस्थापनां कडल्यान गरजेच्यो उपाय येवजण करूंक नात. कांय इमारती रित्यो आसल्यो तरीय आशीकुशीक गर्दी आसता. ताका लागून दक्षीण गोंय जिल्हो प्रशासना कडल्यान कसलीय दुर्घटणा घडचे आदींच ह्या पोरण्या इमारतीं कडेन लक्ष दिवचें, अशी मागणी लोकांनी केल्या.
दोन वर्सां आदीं गांधी मार्केटा लागसारचे कासा मिनेझीस इमारतीचे एके वटेंतलो भाग पयल्याच पावसांत कोसळिल्लो. त्या वेळार जिल्हो प्रशासना कडल्यान पळोवणी करून हे इमारतींतले दुकानकार आनी हेर आस्थापनांक सुवात रिती करपाक सांगिल्लें. मात अजून लेगीत इमारतीचे दुसरे वटेंतलीं दुकानां बिनधास्त चालू आसात.
पोरूं पिंपळकट्ट्यार एके इमारतीचें प्लास्टर पडिल्ल्यान रस्त्या वयल्यान वचपी एक बायल जखमी जाल्ली. तशेंच एके मोटारीचेंय लुकसाण जाल्लें. अशी परिस्थिती मडगांव शारांतल्या हेर घातक स्थितींतल्या इमारतींची आसा. कांय इमारती पुर्तुगीज काळांतल्यो आसात. तांची देखभाल, दुरुस्ती योग्य तरेन केली जाल्यार दायजस्थलांचें संवर्धनूय जातलें. मात कांय इमारतींचो फक्त सांगाडो उबो आसा. तांची देखभाल, दुरुस्ती करून कसलोच फायदो जावचो ना. त्यो योग्य वेळार मोडून उडयल्यार ते पासून आशिल्लो धोको सोंपतलो. मडगांव पालिका वाठारांतल्या घातक स्थितींतल्या इमारतींचो मुद्दो दर वर्सा चर्चेक येता, पूण गरजेच्या उपाय येवजण्यां बगर वर्स सोंपता.
मडगांव पालिके कडल्यान पोरण्यो आनी घातक स्थितींत आशिल्ल्या इमारतींच्या धनयांक हे आदींच नोटिसो धाडल्यात. मात इमारतींच्या धनयां कडल्यान योग्य प्रतिसाद मेळना. घर नाशिल्ले कांय जाण रातच्या वेळार ह्या इमारतींनी रावतात. पालिका वाठारांतल्यो कांय इमारती अर्दवट बांदकाम करून दवरल्यात. ह्याच इमारतींनी बिगर गोंयकार रावतात. शारा लागसार आशिल्ल्यो मोडपाक पाविल्ल्यो इमारतींत तांकां आलाशिरो मेळटा. न्यू मार्केटाची अवस्थाय बरी ना. इमारतीच्या तळमाळ्यार शेंकड्यांनी दुकानां आसात. दर दिसा शेंकड्यांनी लोक बाजार करपाक येतात. वयल्या माळ्यांची स्थितीय भिरांकूळ जाल्या. हे इमारतीचे दुरुस्ते कडेन लक्ष दिवपाची गरज आसा.
जिल्हो आपत्ती वेवस्थापनान दखल घेवप गरजेची
जूनांत मॉन्सून दाखल जातलो. ह्या पावसाळ्यांत घातक जाल्ल्या इमारतींचो कांय भाग कोसळपाची वा पुराय इमारतूच कोसळपाची भिरांत थळाव्या लोकांनी उक्तायल्या. ताका लागून मडगांवच्या आमदारां सयत पालिका प्रशासना सयत जिल्होधिकारी आनी जिल्हो आपत्ती वेवस्थापना कडल्यान ह्या पोरण्या जाल्ल्या घातक इमारतींचो मुद्दो गंभीरपणान घेवन उपाय येवजण करपाची गरज आसा.
शारांतल्यो पोरण्यो घातक इमारती
2012 आनी 2013 त केल्ल्या सर्व्हेक्षणांत टी. बी. कुन्हा शाळा इमारत, पॉप्युलर शाळा इमारत, पोरणी पालिका इमारत, सुकडो इमारत, गोल्डन फोटो स्टुडियोची इमारत, शंकर कॉ ऑपरेटीव्ह सोसायटीची इमारत, गॅलेक्सी इमारत, ग्रॅसियस फुर्तादो इमारत, प्रेडियो कार्दोज इमारत, न्यू इरा शाळा इमारत, लोटलीकार इमारत, व्हिला कुतिन्हो इमारत, इगिना कुलासो घर, पेद्रू लुईस घर, परिश्रम रायकार इमारत, लाडू रायकार इमारत, तिळवे इमारत, चुरी इमारत, मार्कान इमारत, सबिना हॉटेल, इजिदोर इमारत आनी कर्पे गावसांतली इमारत हांचो पोरण्या घातक इमारतींत आस्पाव जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
