भांगरभूंय | प्रतिनिधी
खबरां संस्था
अहमदाबादः गुजरात टायटन्स आनी चेन्नप सुरप किंग्ज हाचे मदी आयपीएलाच्या 16व्या सिझनाची फायनल उटंगाराच्या पावसाक लागून जावपाक शकली ना. आयतारा सांजे अहमदाबादांत सुरू जाल्ल्या पावसाक लागून ही मॅच सोमाराक 29 मेक ह्या राखीव दिसा सांजे 7.30 वरांचेर खेळोवपाचें थारायलां. मात सगळें कितें पावसाचेर निंबून आसा.
सोमाराक ही फायनल जावपाक शकली ना जाल्यार गुण क्रमवारींत पयले सुवातेर आशिल्ल्या गुजरात टायटन्साक जैतिवंत घोशीत करतले आनी फायलन खेळनास्तना गुजरात सेगीत दुसरे फावट वस्ताद थारतोलो. आयसीसी सर्तींत फायनल रद्द जाल्यार दोनूय पंगडाक जैतिवंत घोशीत करतात. आयपीएलांत फायनल रद्द जाल्यार दोनूय पंगडात जोड वस्ताद जाहीर करतले वा गुण क्रमवारी प्रमाण चॅम्पिय़न घोशीत करतले.
आयताराची फायनल 9.35 वरांचेर सुरू जाल्ली जाल्यार ती पुराय 20 ओव्हरींची जाताशिल्ली. मात 12.6 मेरेन पांच ओव्हरीचीं मॅच जाली ना जाल्यार सोमाराच्या राखीव दिसा खेळोवपाचे थारिल्लें. नरेंद्र मोदी स्टेडियमाचेर उदक जाल्ल्यान निमाणे मॅच राखीव दिसा खेळोवपाचो निर्णय घेतलो.
हार्दिक पंड्याच्या फुडारपणा सकयल्ल्या गुजरात टायटन्साक आयपीएल वस्तादपण तिगोवन दवोरपाचें चेंपण आशिल्ले, तांणी लीग पांवड्यार आनी प्ले ऑफ मेळून वट्ट 16 मॅची खेळून तांतूतल्यो 11 जिखल्यात आनी पांच मॅचींनी हार घेतल्या. महेंद्र सिंग धोनी हाच्या चेन्नस सुपर किंग्ज चार फावट आयपीएलांत वस्तादपण मेळयलां. मुंबय इंडियन्साच्या पांच जैतां कडेन बोरोबोरी करपाची संध तांकां आसा. व्हो पंगड 10वे फावट फायनल खेळटलो. तांणी लीग आनी प्ले ऑफ मेळून 14 मॅची खेळून तातूंतल्यो 9 मॅची जिखल्यात आनी पांच मॅचींत हाऱ घेतल्या.
चेन्नयच्या अंबाती रायडून ही आपली निमणी आयपीएल मॅच आशिल्ल्याचें जाहीर केला. ताणे ह्या सिझनात 15 मॅचींत 132.38 च्या स्ट्रायक रेटान 139 धांवड्यो केल्यात. आयपीएलांतल्या 203 मॅचींत ताणे वट्ट 4329 धांवड्यो केल्यात. तातूंत 1 शेंकडो आनी 22 अर्द शेंकडे आसात.
आयपीएल लीग गुण तकटो
(मॅची खेळले, जिखले, हारले, टाय आनी गुण प्रमाण)
गुजरात टायटन्स- 14, 10, 4, 0 20
चेन्नय सुपर किंग्ज- 14, 8, 5, 0, 17
लखनौ सुपर जायंट- 14, 8, 5, 0, 17
मुंबय इंडियन्स – 14, 8, 6, 0, 16
राजस्थान रॉयल्स- 14, 7, 7, 0, 14
रॉयल चलेंजर्स बंगळुरू- 14, 7, 7, 0, 14
कोलकाता नायट रायडर्स- 14, 6, 8, 0 12
पंजाब किंग्स – 14, 6, 8, 0 12
दिल्ली कॅपिटल्स- 14, 5, 9, 0, 10
सनरायजर्स हैदराबाद- 14. 4, 10, 0, 8
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
