भांगरभूंय | प्रतिनिधी
पेडणें: मोरजी पंचायत वाठारांतले मुख्य रस्ते आनी भितरल्या रस्त्यांच्या कुशीक व्हड प्रमाणांत वेगवेगळ्या वेवसायिकांनी आपापल्या वेवसाया संबंदांत बेकायदो बोर्ड लायल्यात. ह्या सगळ्या बोर्डां आड मोरजी पंचायतीन ध़डक मोहीम हातांत घेतल्या.
पंचायती कडल्यान कसलेच तरेचो नाहरकत दाखलो घेनासतना वा पंचायतीक कर लेगीत भरिनासतना हे बोर्ड लावन अतिक्रमण करपाचो यत्न वेवसायिकांनी केला. ह्या बोर्डां आड मोरजी ग्रामसभेंत थळाव्या लोकांनी साबार खेपे ते बोर्ड काडून उडोवचे अशी मागणी केल्या. हे बोर्ड गाडी चलोवप्यांक आनी हेर लोकांकूय त्रासदिणें थारतात, अश्यो थळाव्यो लोकांनी पंचायती कडेन कागाळी केल्ल्यो. ह्या कागाळींची दखल घेवन मोरजी पंचायतीन 26 मेच्यान ह्या बोर्डांचेर कारवाय करपाची मोहीम हातांत घेतल्या. ह्या वेळार घडणुकेचे सुवातेचेर उपसरपंच पवन मोर्जे, पंच मुकेश गडेकार, पंचायत सचीव, कामगार हाजीर रावून बोर्ड काडपाचें काम झुजां पांवड्यार चालू आसा.
मोरजी पंचायत वाठारांत व्हड प्रमाणांत रस्त्याचे कुशीक अतिक्रमण करून बेकायदो बोर्ड लायिल्ले. ह्या बोर्डांचेर चालू आशिल्ले कारवाये संबंदांत उपसरपंच मोर्जे हांणी सांगलें, ह्या बेकायदो बोर्डां आड साबार खेपे ग्रामसभेंत थाराव मंजूर केले. बेकायदो आशिल्ले बोर्ड काडपाचो पंचायत मंडळान निर्णय घेवन ते काडपाचें काम सुरू केलां.
जांका कोणाक बोर्ड लावपाचे आसात तांणी वेवस्थीत कायदेशीर तरेन मोरजी पंचायतीचे परवाने घेवन लावचे. लोकांक त्रास जातात, अशे सुवातेर बोर्ड लावपाक पंचायत परवानगी दिवची ना, अशेंय उपसरपंच मोर्जे हांणी स्पश्ट केलें.
मोरडी पंचायत वाठारांत आनी हेर वाठारांत जे मुखेल आनी भितरले रस्ते आसात, ताचे कुशीची सुवात भौशीक बांदकाम खातें रस्तो विभागान संपादीत केल्यात. पूण भौशीक बांदकाम खात्याची सुवात खंय पासून खंय मेरेन आसा ताचें डीमार्केशन जावप गरजेचें आसा.
भौशीक बांदकाम खात्याच्या रस्तो विभागा कडेन सुवात संपादीत करून सरकारान दिल्या, पूण ते सुवाते कडेन रस्तो विभागाच्या अधिकाऱ्यांची आडनदर जाल्या. ताका लागून रस्त्याचे कुशीक व्हड प्रमाणांत अतिक्रमण चालू आसा. हया अतिक्रमणांचेर आयज मेरेन भौशीक बांदकाम खात्यान कसलीच कारवाय करूंक ना. जे पद्दतीन भौशीक बांदकाम खात्याच्या रस्त्या कुशीक सरकारी जमनींत अतिक्रमण सुरू आसात, ती सुवात आदीं सुरक्षीत करची. तशेंच जांणी अतिक्रमण केलां, तांचेर कारवाय करची, अशें निवेदन हे आदींच मोरजी पंचायतीन रस्तो विभाग, उपजिल्होधिकारी, मामलेदार हांकां निवेदन सादर केलां, अशीय म्हायती उपसरपंच मोर्जे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
