तेंगशेर वचपाक संकश्टाचेर जैत जोडचेंच पडटा

भांगरभूंय | प्रतिनिधी

श्रमेश भोसलेः व्हीकेएसएस सोसायटीचो बँकींग कावंटर परतून सुरू

भांगरभूंय । प्रतिनिधी

सावयवेरें: खंयचीय संस्था स्थापन करप सोंपी आसता, पूण ती चलोवप खूब कठीण. णव वर्सां बंद पडिल्लें बँकींग कावंटर परतून सुरू केल्ले खातीर जय भारत व्हीकेएसएस सोसायटी लिमिटेड संस्थेच्या कार्यकारिणीचें कवतूक. संस्थेक उंच तेंगशी मेळोवपाची आसत जाल्यार कठीण प्रसंगाक फुडो करून संकश्टाचेर जैत जोडून फुडें वच्चेंच पडटलें, अशें जिल्हो पंचायत वांगडी श्रमेश भोसले हांणी सांगलें.

केरी फोंडेंच्या जय भारत व्हीकेएसएस सोसायटी लिमिटेडाचें बंद पडिल्लें बँकींग कावंटर परतून सुरू केलां. ताचो उक्तावण सुवाळो केरी पंचायत सभाघरांत घडोवन हाडिल्लो. ह्या वेळार भोसले उलयताले.

ह्या सुवाळ्याक केरीची सरपंच तृप्ती नायक, सोसायटीचे अध्यक्ष प्रकाश नायक, संचालक सीताराम गावडे, सुरेश गावडे, सुभाष पालसरकार, वैशाली केरकार, सुरेश जल्मी हाजीर आशिल्ले.

संस्थेन लोकांची विस्वासाहर्ता सांबाळप खूब गरजेचें. बेरोजगार तरणाट्यांनी स्वयं रोजगारा कडेन वळून गांवांतले सोसायटींतल्यान रीण काडून बरो वेवसाय सुरू करचो. तातूंत कसो फायदो जातलो हाचो विचार करचो आनी आपली जीण सुखी करची. तशेंच रिणाची परतफेड वेळार करची, जे वरवीं सोसायटीची उदरगत जातली आनी संस्था उंच उड्डाण मारतली, अशेंय भोसले हांणी सांगलें.

तृप्ती नायक हांणी सांगलें, बरें काम करात आनी गिरायकांक बरी सेवा दियात. सोसायटीची उदरगत निश्चीत जातली. सध्या ही सोसायटी वेवस्थीत चलता हे खातीर तांणी कार्यकारिणीक परबीं दिली.

आदीं सोसायटींत अंदाधुंदी जाल्ल्यान बँक कावंटर बंद करचो पडिल्लो. रिणाची थकबाकीय खुबूच वाडिल्ली. नव्या संचालक मंडळान कारभार हातांत घेतले उपरांत खर मेहनत करून णव वर्सां आदलें उरिल्लें ऑडीट पुराय केलें. वांगडी हे सोसायटीचे धनी आसतात. ताका लागून वांगड्यांनी जागरूक जावप गरजेचें आसा, सीताराम गावडे हांणी सांगलें.

सुभाष पालसरकार हांणीय ह्या वेळार मनोगत उक्तायलें. वैशाली केरकार हांणी येवकार दिलो. प्रकाश नायक हांणी अहवाल वाचून दाखयलो. श्रमेश भोसले हांचे हस्तुकीं फीत कापून बँकींग कावंटराचें उक्तावण केलें. हर्षा गावडे हांणी सुत्रसंचालन केलें जाल्यार सुरेश जल्मी हांणी उपकार मानले.