भांगरभूंय | प्रतिनिधी
बोरी जंक्शनार थळाव्या लोकांचीं निदर्शनां
भांगरभूंय । प्रतिनिधी
फोंडें: बेतकी बोरी वाठारांत नव्यान उबारपा आशिल्ल्या इस्कॉन प्रकल्पाक थळाव्या लोकांनी विरोध केला. तरी लेगीत वाठारांत रस्तो करपाचें काम नेटान सुरू जाला. दोंगराळ वाठारांत प्रकल्प उबारलो जाल्यार सैमीक उदका स्त्रोतांचेर गंभीर परिणाम जातले असो दावो करून आयतारा थळाव्या लोकांनी बोरी जंक्शनाचेर रस्त्या कुशीक उबे रावून प्रकल्पा आड निदर्शनां करून काम बंद करपाची मागणी केली.
बोरये दोंगराळ वाठारांत आशिल्ल्या बेतकी गांवांत दर वर्सां उदकाची समस्या निर्माण जाता. पूण फाटल्या दोन वर्सां सावन दोंगराळ वाठारांत इस्कॉन प्रकल्प उबारपाचे यत्न सुरू जाल्यात. साबार ग्रामसभांनी प्रकल्पा आड थाराव घेवन लेगीत पंचायत मंडळान प्रकल्पा लागसार रस्तो करपाची परवानगी दिल्या. ते प्रमाण रस्त्याचें काम सुरू जालां. ते काम बंद करचें, अशी थळाव्या लोकांनी मागणी लावन धरल्या.
हे विशीं अदीक म्हायती दितना राहुल नायक हांणी सांगलें, ह्या मुद्द्याचेर ग्रामसभेंत साबार खेपे आवाज काडला. तरी लेगीत पंचायत मंडळान प्रकल्पा लागसार रस्तो करपा खातीर परवानगी दिल्या. थळाव्या लोकांचो उदकाचो प्रस्न सोडोवपाचे नदरेन पंचायत मंडळ कसलेच यत्न करिना. उरफाटे दोंगराळ वाठारांत प्रकल्प उबारून सैमीक झरे काबार करपाचो यत्न चल्ला. दोंगर कांपणी करून प्रकल्प उबारपाक थळाव्या लोकांचो खर विरोध आसा.
प्रकल्पाक परवानगी दिवची न्हयः परेरा
बांयो आनी झरे सुरक्षीत दवरचे खातीर दोंगराळ वाठारांत येवपी इस्कॉन प्रकल्प आडावपाची खर गरज आसा. प्रकल्प उबो रावलो जाल्यार थळाव्या लोकांचो उदकाचो प्रस्न आनीक गंभीर जातलो. आदीच उदकाची समस्या थळाव्या लोकांक सतायता. पंचायत मंडळान ह्या प्रकल्पाक परवानगी दिवची न्हय, अशें कायतान परेरा ह्या थळाव्या नागरिकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
