भांगरभूंय | प्रतिनिधी
मधू नायकः ओबीसीं खातीर जाली जनजागृती कार्यावळ
भांगरभूंय । प्रतिनिधी
मुरगांवः समाजांत कसलोय न्याय मागचे खातीर रिसतर संघर्शा बगर पर्याय ना. हेर मागासवर्गियां खातीर उच्च शिक्षणांत आरक्षण मेळचें हे खातीर ओबीसी समाजान एकवटान संघर्श केल्ल्यान वैजकी पदव्युत्तर शिक्षणांत सरकाराक आरक्षण दिवचें पडलें. हे खातीर खस यत्न करचे पडले ह्या वावरांत व्ही. पी. सिंह आनी अर्जून सिंह ह्या दोगांनीय म्हत्वाचें योगदान दिलें, अशें ओबीसी म्हासंघाचे अध्यक्ष मधू नायक हांणी मुखेल सोयरे म्हूण उलयतना सांगलें.
28 मेक गोवा क्षत्रीय मराठा समाज मुरगांव फांटो आनी एससी ओबीसी म्हामंडळाच्या जोडपालवान एससी ओबीसी आनी दुबळ्या घटकां खातीर जनजागृती कार्यावळ आयोजीत केल्ली. ह्या वेळार मधू नायक उलयताले.
ह्या वेळार माचयेर गोवा क्षत्रीय मराठा समाजाचे ज्येश्ठ फुडारी पद्मनाभ आमोणकार, गोवा क्षत्रीय मराठा समाज मुरगांव फांट्याचे अध्यक्ष प्रा. सुनील शेट, महिला विभाग अध्यक्ष अक्षदा वाडेकार, ओबीसी म्हामंडळाचे वेवस्थापक राम परवार हाजीर आशिल्ले.
सुनील शेट हांणी येवकार दिलो आनी प्रास्तावीक केलें. तांणी जनजागृती कार्यावळीच्या आयोजनाचो हेतू स्पश्ट केलो. मधू नायक हांणी ह्या वेळार गोवा क्षत्रीय मराठा समाज मुरगांव फांट्याक संविधानाची प्रत तशेंच महात्मा ज्योतिबा फुले आनी सावित्रीबाई फुले हांचे फोटो भेटयले. मानेस्तां हस्तुकीं दिवली पेटोवन कार्यावळीचें उक्तावण केलें. ह्या वेळार राम परवार हांणी एससी आनी ओबीसी तशेंच हेर दुबळ्या घटकां खातीर आशिल्ल्या सरकारी येवजण्यांची खोलायेन म्हायती दिली. तांकां वंदना नायक आनी जयेश आर्लेकार हांणी आदार केलो. सुनयना शेट हांणी सुत्रसंचालन केले जाल्यार अक्षदा वाडेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
