भांगरभूंय | प्रतिनिधी
कांता पाटणेंकारः मयें मतदारसंघांतल्या विद्यार्थ्यांचो भोवमान
भांगरभूंय । प्रतिनिधी
दिवचलः आयज शिक्षणाची व्याख्या बदल्ल्या. मनीस घडोवपी शिक्षण, चारित्र्य आनी चरित्र घडोवपी, संस्कार दिवपी शिक्षण अपेक्षीत आसा. नवें शिक्षणीक धोरण निश्चीतपणान नवभारताचे निर्मिती खातीर आनी परिपूर्ण विद्यार्थी घडोवपा खातीर फायद्याचें थारतलें, अशें ज्येश्ठ शिक्षक कांता पाटणेंकार हांणी सांगलें.
आमदार प्रेमेंद्र शेट हांचे वतीन सांतेरी सेवा संघाच्या पालवान मयें मतदारसंघांतल्या यत्ता धावी आनी बारावी परिक्षेंत विशेश प्राविण्य मेळयिल्ल्या विद्यार्थ्यांचो भोवमान सुवाळो मयेंच्या सांतेरी सभाघरांत आयोजीत केल्लो. त्या वेळार पाटणेंकार उलयताले.
ह्या वेळार माचयेर आमदार प्रेंमेंद्र शेट, सरपंच सुवर्णा चोडणकार, प्रेमानंद म्हाबरे, शंकर चोडणकार, दयानंद कारबोटकार, महेश सावंत, विश्वास चोडणकार हाजीर आशिल्ले.
ध्येयान पिशे जाल्ले शिक्षक आसप गरजेचें आसा. नोकरी न्हय जाल्यार एक मिशन म्हूण काम करपी शिक्षक जावप गरजेचें आसा. राज्यांत पयशा खातीर कोणाचेंच शिक्षण उरचें ना, हाची जापसालदारकी सरकारान घेतल्या. खूबश्यो सुविधा आसात, ताचो लाव घेवचो, असो उलो पाटणेंकार हांणी मारलो.
गांवगिऱ्या वाठारांतल्या भुरग्यांनी बरें येस मेळयलां. सर्वांगी मानवी उदरगत आनी जिणेचे परिक्षेंत येसस्वी जावपी शिक्षणाची आयज गरज आसा. सरकारान विद्यार्थ्यां खातीर खूबश्यो सुविधा उपलब्ध केल्यात. विद्यार्थ्यांनी तांचो लाव घेवन उंच उड्डाण मारचें, अशें आमदार प्रेमेंद्र शेट हांणी सांगलें. मयें मतदारसंघांतले दोन विद्यार्थ्यांनी गोंयांत पयलो आनी तिसरो नंबर मेळयला, तांकां तांणी विशेश परबीं दिलीं. ह्या वेळार विद्यार्थ्यांचो तशेंच शिक्षकांचो भोवमान केलो. प्रेमानंद म्हांबरे हांणी करिअर संदी विशीं मार्गदर्शन केलें. शंकर चोडणकार हांणी येवकार दिलो. विश्वास चोडणकार हांणी सुत्रसंचालन केलें. ह्या वेळार शिक्षक, पालक आनी विद्यार्थी व्हड संख्येन हाजीर राविल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
