भांगरभूंय | प्रतिनिधी
साधन सुविधा गायब; लोकांच्या करांचो पयसो सार्थकी लावपाची मागणी
भांगरभूंय । प्रतिनिधी
पेडणें: सुरूच्या झाडांक लागून केरी दर्यादेगेक पर्यटनाचे नदरेन आगळें म्हत्व फावो जालां. ह्या झाडांक राखण मेळची हे नदरेंतल्यान शिंपणावळ खात्या खाला केंद्र सरकाराच्या निधींतल्यान राखणे वणत बांदली. त्या वेळार तेन्नाचे मुख्यमंत्री प्रा. लक्ष्मीकांत पार्सेकार हांचे सुचोवणे वयल्यान शिंपणावळ विभागा खाला आनी पर्यटन मळाक संद मेळची, थळाव्या लोकांक तशेंच पर्यटकांक सुसेग घेवपाक मेळचो, हे खातीर हे दर्यादेगेर एका थारावीक सुवात आसची, म्हूण आजोबा बाग बांदली. पूण सध्या हे बागेची आवतिकाय जाल्या.
आजोबाचे जात्रे निमतान हे बागेचें उक्तावण जालें. थंय बसपा खातीर बांक तशेंच विजेची वेवस्था केली. कांय दीस हे बागेची जतनाय घेतली, पूण उपरांत मात बागेंत लायिल्ले बल्ब फोडपाचे प्रकार सुरू जाले. कांय दिसांनी लायटीचे खांबे कळमले. कांय बांक गायब जाले. सध्या ती बाग काय आनीक कितें असो प्रस्न पडटा.
हे बागेची देखरेख दवरचे खातीर तशेंच जतनाय घेवचे खातीर सरकारान कसलीच उपाय येवजण करूंक नाशिल्ल्यान बागेची आवतिकाय जाल्या. ही बाग उबारपा खातीर लाखांनी रुपया खर्च केल्ले. मांद्रें मतदारसंघाचो विचार केलो जाल्यार मांद्रें मतदारसंघांत वट्ट तीन बागो आसात. तातूंत सगळ्यांत फामाद म्हणल्यार मोरजी खींड वाठारांतली बाग आनी दुसरी म्हणल्यार जुनसवाडो फॉरेस्ट पार्क आनी तिसरे सुवातेचेर आजोबा बागेचो नंबर लागतालो. ह्यो तिनूय बागो प्रा. पार्सेकार आमदार आनी मुख्यमंत्री आशिल्ले त्या काळांत निर्माण जाल्ल्यो.
फॉरेस्ट पार्क बागेंत भुरग्यांक खेळपा खातीर कसल्योच सुविधा नात, पियेवपाच्या उदकाची, पार्कींग वेवस्था ना. झाडां शिंपचे खातीर उदक वेवस्था नाशिल्ल्यान झाडां मरतात. मोरजी खींड वाठारांतले बागेंत मात भुरग्यांक खेळपा खातीर विवीध साधन सुविधा आसात. ताका लागून थंय भुरगीं आनी ताचे पालक लेगीत व्हड प्रमाणांत येतात. ह्या तिनूय बागांची वेवस्थीत जतनाय घेवन लोकांच्या करांचो पयलो सार्थकी लावचो, अशी मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
