भांगरभूंय | प्रतिनिधी
गुजरात टायटन्सान सेगीत दुसरे खेपे इंडियन प्रिमीयर लिगेचे (आयपीएल) फायनलींत सुवात मेळयली. हांगाच्या नरेंद्र मोदी स्टेडियमाचेर जाल्ले क्वॉलिफायर दोन मॅचींत ताणें मुंबय इंडियन्साक 62 धांवड्यांनी हारयलो.
गुजरात टायटन्स आतां आयतारा जावपी फायनलींत चेन्नय सुपरकिंग्सा आड खेळटलो. गुजरातान दिल्ले 234 धांवड्यांचे मोखीचो फाटलाव करपी मुंबय इंडियन्साचो डाव 18.2 ओव्हरींनी 171 धांवड्यांचेर सोंपलो.
मुंबय इंडियन्सा वतीन सुर्यकुमार यादवान सगल्यांत चड 61 धांवड्यो केल्यो, ताच्या उपरांत तिलक वर्मान 43 आनी कॅमरून ग्रिनान 30 धांवड्यांचें योगदान दिलें. ह्या तिगांक सोडले जाल्यार मुंबयच्या एकाय बॅट्समनाक दोट्टी आंकडो हुपपाक जमलो ना. गुजरात टायटन्सा वतीन मोहित शर्मान 10 धांवड्यो दिवन पांच विकेटी घेतल्यो. मोहम्मद शमी आनी राशिद खान हांकां दरेकी दोन विकेटी फावो जाल्यो.
ते आदीं टॉस हारल्या उपरांत पयलीं बॅटींग करतना गुजरात टायन्सान शुभमन गिलाच्या शेंकड्या नेटार 3 बाद 233 धांवड्यां मेरेन मजल मारली. गिलान 60 बॉलांनी सात चवके आना 10 सक्यांचे मजतीन 129 धांवड्यो केल्यो. गिला उपरांत साई सुदर्शनान व्हड खेळी केली. ताणें 31 बॉलांनी 5 चवके आनी एक सक्याचे मजतीन 43 धांवड्यो करून रिटायर्ड हर्ट जालो. वृद्धिमान साहान 16 बॉलांनी 18 धांवड्यांची खेळी केली. अखेरेक मुखेली हार्दिक पांड्यान नाबाद 28 आनी राशिद खानान नाबाद 5 धांवड्यो केल्यो.
गिलान फाटल्या चार डावांतलो तिसरो शेंकडो मारलो.ताणें मुंबय इंडियन्साच्या बॉलरांची बॉलिंग फोडून काडलो. टीम डॅव्हिड आनी तिलक वर्मा हांणी गिलाच्यो सोडिल्ल्यो कॅची मुंबय इंडियन्साक म्हारग पडल्यो.
मुंबय इंडियन्साचे सगलेच डावपेच चुकले. तातूंत भर म्हणल्यार इशान किशन आनी रोहित शर्मा हांणी दुखापतीक लागून मैदान सोडलें.
शुभमन गिल आनी वृद्धिमान साहा हांणी पयले विकेटी खातीर अर्द शेंकड्याची भागिदारी केली. पियुष चावलान गुजराताक पयलो धपको दिलो. ते उपरांत गिल आनी साई सुदर्शन हांणी आपलो शेक दवरलो. गिलान 49 बॉलांनी चार चवके आनी स सक्यांचे मजतीन अंदूंच्या हंगामांतलो तिसरो शेंकडो मारलो.
साई सुदर्शना वांगडा दुसरे विकेटी खातीर गिला वांगडा 64 बॉलांनी 138 धांवड्यांची भागिदारी केली. गिलाचो दरेक शॉर्ट पळोवपा सारको आशिल्लो. 17वे ओव्हरींत आकाश मढवालान मुंबय इंडियन्साक मोठी विकेट मेळोवन दिली. ताणें गिलाक बाद केलो.
गिलाच्या खेळान मुंबयचे बॉलर आबूज जाल्ले भशेन दिसले. ताचो फायदो सुदर्शन आनी हार्दिक पांड्या हांणी फायदो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
