भांगरभूंय | प्रतिनिधी
आकाश मढवालाच्या उत्कृश्ट बॉलिंगे नेटार अॅलिमिनेटर मॅचींत लखनौ सुपर जायण्ट्साक व्हडा फरकान हारयल्या उपरांत उत्साहीत आशिल्ल्या मुंबय इंडियन्साक आयज जावपी दुसरे क्वॉलिफायर मॅचींत सध्याचो वस्ताद गुजरात टायटन्साच्या खर आव्हान तोंड दिवचें पडटलें.
मढवालान बुधवारा चेन्नयच्या चेपॉक मैदानाचेर जाल्ले मॅचींत पांच धांवड्यांनी पांच विकेटी घेवन पांच खेपेचो वस्ताद मुंबय इंडियन्साक लखनौ आड 81 धांवड्यांनी जैत मेळोवन दिवपाक मोलादीक योगदान दिल्लें.
जसप्रीत बुमरा आनी जोफ्रा आर्चर ह्या सारक्या खेळगड्यांचे गैरहाजेरेंत लेगीत मुंबय इंडियन्सान जोडिल्लें हें व्हड जैत दुसऱ्या पंगडां खातीर शिटकावणी आसा.
अंदूंच्या हंगामांत मुंबय इंडियन्साक आपल्या प्रदर्शनांत सातत्य दवरपाक जमूंक ना. पूण, योग्य वेळार तो फॉर्मांत आयिल्ल्याचें संकेत मेळ्ळ्यात. कॅमरून ग्रीन, सुर्यकुमार यादव आनी टीम डॅव्हिड हांणी आव्हानांक योग्य रितीन तोंड दिलां. तांचे खेरीत युवा बॅट्समन नेहल बढेरान लेगीत आपलो प्रभाव सोडला. रोहित शर्मा आनी इशान किशन ही ओपनरांची जोडी लेगीत आपली भुमिका योग्य रितीन वठयत आसा. ह्या बॅट्समनां मुखार गुजराताच्या बॉलरांचो कस लागतलो.
लखनौ आड मढवालान जबरदस्त प्रदर्शन केल्लें. आयचे मॅचींत लेगीत ताच्या कडल्यान तश्याच प्रदर्शनाची आस्त मुंबय इंडियन्साक आसतली. अणभवी लेग स्पिनर पियुष चावला आनी फास्ट बॉलर जेसन बेहरेनडॉर्फ हांणी लेगीत बरी बॉलिंग केल्या.
दुसरे वटेन गुजराताक पयले क्वॉलिफायर मॅचींत चेन्नय सुपरकिंग्सा आड हार घेवची पडिल्ली. सेगीत दुसरे खेपे फायनलींत सुवात मेळोवपा खातीर गुजराताक बरें प्रदर्शन करचें पडटलें. ताच्या सगल्या खेळगड्यांनी उत्कृश्ट रितीन योगदान दिलां.
आयपीएलांत अजून मेरेन दोनूय पंगडां मदीं फकत तीन मॅची जाल्यात. हातूंत मुंबय इंडियन्स 2-1 असो मुखार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
