भांगरभूंय | प्रतिनिधी
सोबीत सुंदर गोंय, कला- गुणांनी भरिल्लें, गोमटें आमचें गोंय. आमच्यो दर्यावेळो, इगर्जो, देवळां आनी आमी सांबाळून दवरिल्लें आमचें दायज पळोवपाक जगाच्या खांची- कोनश्यातले पर्यटक येतात. सद्या गोंयांत पुराय सोशल मिडीयाचेर बिर्ला देवूळ चर्चेंत आसा. पळयत थंय ह्या देवळाचे व्हिडीयो, फोटो पळोवपाक मेळटात. बिर्ला ग्रुपान भारतांतल्या वेगवेगळ्या शारांनी सुंदर देवळां बांदल्यात. आमच्या गोंयांत लेगीत तांणी दक्षीण झुआरी- सांकवाळ हांगां राधाकृष्णाचें सोबीत देवूळ बांदलां. ताणें फक्त गोंयकाराचेंच न्हय तर भारतांतल्या हेर पर्यटकांचें लेगीत लक्ष आकर्शून घेतलां.
देवळाची रंगीत चर्चा आयकून, थंयचे फोटो पळोवन म्हज्या मनांत उमळशीक, उत्सुकताय निर्माण जाली… आनी आमीय तें देवूळ पळोवपाक गेलीं. वचपाचो दीस थारलो. विलूदाच्या पावलांनी सांज आयली आनी प्रवासाक सुरवात जाली. बांबोळेच्यान गच्च फुलांनी सजयल्ल्या फुलां खुर्साक नमन करीत पाळे- शिरदोनच्या नव्या रस्त्यार, लिकलिकपी लायटीं… हेर गाडयांच्या सांगातान आमचीय गाडी मुखार वचत रावली. वतना पयसुल्यान पलतडच्या पडंग वाठारांतल्यान ह्या देवळाचें हंय न्हयशें दर्शन जालें. उत्सुकताय आनीक वाडली. केन्ना काय देवळा कडेन पावन जाल्ले. गजाली मारता- मारता बिर्ला मंदिराची व्हड पाटी दिसली. अख्खो वाठार पळोवन आमकां अजाप दिसलें. आमकां गाडयेंतल्यान देवपाक म्हूर्त मेळना. कारण म्हामार्गार दोनूय वटांनी हिसपा भायर गाडयो. गाडी फाटींफुडें घुंवयत निमणे एकदाचें पार्किंग मेळ्ळें आनी आमी देवळाची वाट धरली. देवळा भायर, भितर वचपी वाठार लेगीत गाडयांनी गच्च भरिल्लो. वाटेर सुरक्षा रक्षक, भाविकांची
दाटी.
मुक्त वातवरणांत वाऱ्याचे थंड झोत आनी सगळ्यांक येवकार दिवपी साबार रंगाची विविध फुलां. देवळाचो प्रवेशमार्ग ते देवळा मेरेनचे सांगाती हें जार्दीन. ताचे देगेर हारीन ल्हान- सान लायटींचे खांबे, फुडें धवे कल्पक आर्क, ताचेर लायटींचो विरळ आनी मळब देवळाक तेंकिल्लेवरीं माथ्या वयल्यान अदींमदीं विमानांची भोवडीं. लायटींनी परजळिल्लें सोबीत पांवडे. चौकाचेर पितारलेले डिजायन, हें पळयत पांवडे चडत शिरंवत देवळांत आमचीं पावलां
पडलीं.
देवळांत भितर सरताच थेट राधाकृष्णाचे दर्शन जाता. देवळाचें वास्तुशिल्प पळयताच आंग रोमांच फुलतात. देवळाचे अवाढव्य खोल अर्द गोलाकारी तक्तपोशीचेर फुलांची वेलबुट्टी, तातून लायटींचो समावेश तशेच थंयच्या प्रत्येक खांब्याचेर नक्षीदार रचना. देवळांत राधाकृष्ण, हनुमान, शंकर- पार्वती, गणपती, राम, लक्ष्मण, सीता अश्यो मुर्ती. दर एकेचो विशेश पोशाख, भांगराळे अलंकार, ताचेर तांबडे, पांचवे, गुलाबी, सोनेरी पड्ड्याचेर रुपें- सुवर्ण भरतकाम. तसोच लायटींची सरभरस. देवाच्या दोनुय बाजूंनी लांब दवरिल्ल्यो रुपांकनी दिवल्यो. हे सजावटीन देवाची गर्भकुड ओडलायणीं दिसताली.
भितर सरताच लोकांची खेट. दोळे दिपकावणें दृश्य थंयच पळयत बसचें अशें दिसता. थंयचो प्रत्येक कोनसो, वणटी आपलें खाशेलेंपण सांगपाच्या यत्नांत दिसता, पूण आयकता कोण? जण एकलो देवदर्शन सोडून फकत सरभोंवतणचो एकूय कोनसो सोडिनासतना फोटो आनी व्हिडीयो शूट करपाचे तनरेंत दिसतालो. थंयचो पुराय वाठार आनी लायटींचे दृश्य विस्मयकारक आशिल्ल्यान जणएकल्याक संगमरवरी फातरी बिर्ला देवळाची केन्नाच ना सोंपपी उमळशीक म्हजेसारकीच आसतली काय, होच प्रश्न मनांत घेवन हांव गाडयेंत बसलें आनी ती मुखार वचपाक लागली. ल्हवू ल्हवू सोबीत देवूळ नदरेआड गेले.
अतिशा सुर्लीकार
7262849923
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
