येवजण आंगलट आयली

भांगरभूंय | प्रतिनिधी

देशभरांत हजारांनी सरकारी येवजण्यो, अनुदानां, सवलती आसात. जांकां ते विशीं खबर आसा, ते तांचो वेवस्थीत फायदो घेतात. कांय येवजण्यो तळागाळांतल्या गरिबांक वयर काडपा खातीर तयार केल्यात. तातूंत पं. नेहरूंच्या वेळा वयल्यो पसून येवजण्यो आसतल्यो. मात, फाटल्या 76 वर्सांच्या काळात कांय लोकांची परिस्थिती ‘जैसे थे’ म्हणटात, तशी आसा. काळ वता तशी गरिबी उणी जावंक जाय. पूण आमच्या देशांत ती वाडतूच आसा. अर्थात भ्रश्टाचार, गैरकारभारा खातीर हें जाता! फक्त राजकी फुडाऱ्यांक दोश दिवन उपकारचें ना. सरकारी यंत्रणेच्या ‘झारींतले शुक्राचार्य’ ह्या सगल्याक तितलेच जापसालदार आसात. सरकारी वा हेर खंयची कुबडी घेवन ल्हवू ल्हवू चलतकच स्वताच्या पांयांचेर उबे राविल्ले पसून अजून ते कुबडेक वेंग मारून आसात. उरफाटे आनीक कुबड्यो, धिगयो मागतात. येवजण्यो, सवलतींक लागून कांय लाचारांनी स्वाभिमान घाणाक दवरला. जांकां गरज आसा, ताणें स्वावलंबी जाय मेरेन सवलती घेवच्यो, जीणभरा खातीर न्हय. ह्यो सवलती गरिबांक मजत करपाक दितात. पूण हालींच्या काळांत मतां खातीर तांचो वापर जावपाक लागला. दक्षीण भारतांतल्या कांय पक्षांनी सवलतींची बुन्याद घाली. (अर्थांत सगल्यांनीच मतांचे आशेन न्हय.) मागीर एकान एक पक्षान हाचें अनुकरण केलें. फाटल्या कांय वर्सांनी तर मुफत येवजण्यो, सवलतींची सर्तूच चालू आसा. इतली की प्रधानमंत्री नरेंद्र मोदी हांणी तिका ‘रेवडी संस्कृती’ नांव दवरलें. ह्यो सवलती, अनुदानां दिवपाक आमी फुडाऱ्यांच्या बोल्सांत वतालो, तो पयसो वापरतात, अशें एक पक्ष सांगता. आयज तांच्याच पक्षाचे दोन फुडारी भ्रश्टाचाराच्या आरोपा खाला बंदखणींत आसात. कांय पक्षांनी आकर्शक येवजण्यो आंखल्यात, त्यो लोकांक दिल्यातूय, पूण कांय वर्सांनी ल्हवूच बंद केल्यात. येवजण्यो, सवलतींचो हो आपालिपा म्हणू येता. खरेंच गरज आसा, थंय ह्यो रेवड्योच न्हय, तर खाजें, लाडू, म्हानांय वाटचीं, पूण जेवचे पयलींच जांकां धेंकर येतात, तांचेर हो पयसो शिंवरचो न्हय. कारण तो लोकांनी दिल्ल्या टॅक्सांतल्यान जमयलो दुडू.
सुरवेक म्हणलां तशें, ह्या येवजण्यां विशीं सगल्यांकूच खबर ना. म्हणटकच तांच्या आमदार, खासदारांनी त्यो तांकां घरपोच व्हरून दिल्यात. अर्थांत हातूंत गरजू मनशां परस पक्षाचे वावुरपीच चड आसतले. मतां खातीरचें हें फेव्हीकोल. हालींच गोंयांतल्या शेतकारां मदीं खवदळ जाला. येवजणे खातीर कांय शेतकारांनी अर्ज करूंक नासतना शेतकी मळाचेर राज्य मुखार वच्चें म्हूण शेतकी खात्यान तांकां ही येवजण मेळोवन दिल्या. तिचें नांव ‘प्रधानमंत्री किसान सन्मान निधी’. राज्यांतले स हजार शेतकामती हे येवजणेचो 2014 सावन लाव घेतात. तातूंतले दोन हजार आतां अपात्र थारल्यात. तांणी येवजणेचो पुराय निधी सरकाराक एक रकमी फारीक करचो, अशी नोटीस शेतकी खात्यान काडल्या. दरवर्सा ह्या शेतकारांक 2- 2 हजार रुपया तीन फावटी मेळटाले. म्हणल्यार वर्साक स हजार. एका धपक्याक हे पयशे भरप सगल्यांकूच शक्य ना. तेन्ना थोडे थोडे करून पयशे भरपाची सवलत शेतकारांक दिवंक फावो. ह्या निधी खातीर गोंयांतले 2000 शेतकार बसनाशिल्ले, अशें शेतकी खात्याचें म्हणणें. पूण हें कळपाक इतलीं वर्सां कशीं लागलीं? हे शेतकामती नेमके कोण, तांची अर्थीक स्थिती, पात्रताय कोणेच कशी पळोवंक ना? आयकर भरपी, निवृत्त सरकारी कर्मचारी, सरपंच, पंच, जिल्हो पंचायत वांगडी, आमदार, खासदार, मंत्री हांकां हे येवजणेचो लाव घेवपाक मेळचो ना, अशी अट येवजणेंत आसा. अपात्र थारिल्ल्यां मदीं आयकर भरपी चड आसात, अशें शेतकी संचालक म्हणटात. कांय शेतकारांच्या नांवाचेर जमनीय नात. थोड्यांच्यो जमनी तांच्या बापायच्या नांवाचेर आसात…. आतां ह्या पुराय प्रकरणाक जापसालदार कोण? अर्ज करूंक नासतना शेतकारांक ही येवजण दिवप बरोबर न्हय. हेर साबार तरांच्यो सवलती जांकां मेळटात तांचीं नांवां पंचायतींनी नोटीस बोर्डाचेर लावंक जाय.
ह्या प्रकरणांत कोण चूक, कोण बरोबर तें कळटलेंच, पूण लोकांनीय पात्र ना जाल्यार येवजण्यां फाटल्यान धांवपाक जायना. रेशनकार्डांचो गैरफायदो घेवपी मेळिल्ल्यान सरकाराक एपीएल बीपीएल कार्डांचो फेरनियाळ घेवचो पडलो. बोगस प्रमाणपत्रां सादर करून नोकरी मेळोवपी तर कितशेच जाण मेळटात. सरकारान सगल्या सवलती, अनुदानां, येवजण्यांचो फेरनियाळ घेतल्यार धपको दिवपी म्हायती मेळटली.