भांगरभूंय | प्रतिनिधी
दिवचलः पावसा आदीं न्हंयेंतलो, व्हाळांतलो चिखल काडपाच्या कामाक शिंपणावळ खात्या वतीन गती दिल्या. दिवचल न्हंय तशेंच सांखळे आनी हेर गरजेचे सुवातेचेर विशेश मशिनां वरवीं चिखल काडपाचें काम झुजा पांवड्याचेर हातांत घेतलां.
पावसाळ्यांत पयल्या पट्ट्यांत जावं गोंयांत उटंगाराचो पावस पडलो जाल्यार दिवचल व्हाळवट न्हंयेक हुंवार येता. ताका लागून संभाव्य धोको टाळचे खातीर दर वर्सा चिखल काडटात. अंदूंय खूबशा वाठारांत चिखल काडपाचो वावर हातांत घेतला. उदकाक व्हावून वचपाक वेवस्थीत वाट मेळची हे खातीर गरजेचे उपाय येवजण करतात, अशें खात्या वतीन म्हणलां.
दिवचल आनी सांखळे न्हंयांचेर पंपींग वेवस्था केल्या. हुंवाराचो धोको उप्रासलो जाल्यार उदक पंपींग करून न्हंयेंत सोडटात. अंदूंय तशीच वेवस्था केल्या.
सांखळी पालिका मंडळान पालिका वाठारांत मान्सूनपूर्व कामां पुराय करचे खातीर नियोजन करून कामां हातांत घेतल्यात, अशी म्हायती नगराध्यक्ष रश्मी देसाय आनी उपनगराध्यक्ष आनंद काणेकार हांणी दिली.
दिवचल पालिका वाठारांतूय सगळ्या प्रभागांनी गटांनी नितळ करपाची प्रक्रिया निमाण्या पांवड्यार पावल्या, अशी म्हायती नगराध्यक्ष कुंदन फळारी हांणी दिली. जे सुवातेचेर उदकाक वचपाक वाट ना, थंय गरजेची उपाय येवजण केल्या. न्हंयेंतलो तशेंच विवीध व्हाळांतलो चिखल काडपाचें काम चालू आसा. लोकांनी तातूंत कोयर उडोवचो न्हय, अशें तांणी सांगलें. सध्या रस्त्याचे कुशीक, न्हंयेंत, व्हाळांत कोयर उडोवपाचे प्रकार वाडल्यात. प्लास्टीक पोतयो आनी हेर कोयर बिनधास्तपणान न्हंयेंत, व्हाळांत वा रस्त्या कुशीक उडयतात. अशा लोकांचेर कारवाय करची, अशी जागरूक लोकांनी मागणी केल्या.
सांखळे पावसाचो झोड
मंगळारा राती कडेन सांखळे आनी सरभोंवतणच्या वाठारांत पावसान झोड दिलो. वादळी वाऱ्याक लागून वातावरणांत थंडसाण निर्माण जाल्ली. कांय कडेन झाडाचे खांदे पडले. कांय कडेन रस्त्याचेर उदक सांचले. दिवलेय वादळी वाऱ्या सयत पावस शिंवरलो. कांय वेळार खातीर वीज पुरवण बंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
