भांगरभूंय | प्रतिनिधी
लाखांनी लिटर उदक राष्ट्रीय म्हामार्गा वयल्यान व्हांवलें
भांगरभूंय । प्रतिनिधी
फोंडें: कुंडयचे उद्देगीक वसणुकेंत बुधवारा सकाळीं 750 एमएमची उदकाची पायपलायन फुटिल्ल्यान राष्ट्रीय म्हामार्गा वयल्यान लाखांनी लिटर उदक व्हांवून गेलें.
उदकाची पायपलायन फुटिल्ल्यान पणजी, सांत आंद्रे, कुमारजुवें आनी प्रियोळ मतदारसंघांतल्या कांय वाठारांतली उदका पुरवण बंद जाल्या. भौशीक बांदकाम खात्या वतीन दुरुस्तीचें काम हातांत घेतलां. हो प्रकार बुधवारा सकाळीं 10.45 वरांच्या सुमाराक घडलो.
कुंडय म्हामार्गा वयल्यान व्हांवपी लाखांनी लिटर उदकाचो कांय परिणाम येरादारीचेर जालो. उदकाची पायपलायन फुटिल्ल्याची खबर कळटाच भौशीक बांदकाम खात्याच्या अधिकाऱ्यांनी घडणुकेचे सुवातेर येवन दुरुस्तीच्या कामाक सुरवात केली. पायपलायन बदलपाचें काम झुजां पांवड्याचेर चालू आसा. हें काम पुराय जाले उपरांत उदका पुरवण सुरू करतले. उसगांव पंचायत वाठारांतल्या गांजे गांवांतल्या लोकांनी बुधवारा उदका प्रकल्प बंद करपाची शिटकावणी दिले उपरांत बांदकाम खात्यान ताची दखल घेवन मंगळारा राती उसरां लोकांक नळाचें उदक उपलब्ध करून दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
