भांगरभूंय | प्रतिनिधी
डॉ. मनोज कामत: इंडियन फेडरेशन ऑफ वर्कींग जर्नालिस्टचें जालें 137वें संंमेलन
हरमल: देशाचे उदरगतींत दिसाळ्यांचो म्हत्वाचो वांटो आसता आनी ताचे कडेन आडनदर करप केन्नाच शक्य जावचें ना. पूण सध्या सोशल मिडिया जरी प्रभावी आसली तरी ताचे विस्वासपात्रतायेचेर प्रस्न निर्माण जाता. स्मार्ट फोन वापरपी स्वताक पत्रकार समजूंक लागला. देखून दिसाळ्यांचेर विस्वास वाडतूच आसा. हें समजून घेवन सरकारान ताचो मान आनी सुरक्षिततायेचो कायदो चालीक लावपाची गरज आसा अशें ज्येश्ठ अर्थतज्ञ डॉ. मनोज कामत हांणी सांगलें.
इंडियन फेडरेशन ऑफ वर्कींग जर्नलिस्ट, गोंयां वतीन आयोजीत एका दिसाच्या 137 व्या संमेलनाच्या उक्तावण सुवाळ्याक मिरामार हांगा डॉ. कामत उलयताले.
ह्या सुवाळ्याक राष्ट्रीय अध्यक्ष अवधेश भार्गवजी, सरचिटणीस संजय जैन, भांडारी जंगा रेड्डी, प्रदेश अध्यक्ष भारत बेतकेकर हाजीर आशिल्ले. ह्या सुवाळ्याक गोंयची ज्येश्ठ पत्रकार सुहासिनी प्रभूगांवकार, पत्रकार सुभाष नायक, पत्रकार प्रकाश तळावणेंकार हांचो भोवमान जालो.
देशांतल्या पत्रकार संघटणांनी एकठांय येवन राजकारण, समाजीक परिस्थिती, अश्या जायत्या गजालींचेर खर भुमिका घेवप गरजेचें अशें सुहासिनी प्रभुगांवकार हांणी मत उक्तायलें.
पत्रकारिता हो एक पवित्र वेवसाय. ताका दाग लागपा सारकें वागचें न्हय अशें सुभाष नायक हांणी पुरस्काराक जाप दितना म्हणलें.
राष्ट्रीय अध्यक्ष भार्गवजी हांणी देशांतल्या पत्रकारांचे सुरक्षीतताये विशीं कायदो आनी योग्य वेतन आयोग, स्थापन करपाची गरज उक्तायली.
ह्या वेळार संघटणे वतीन डॉ. मनोज कामत हांकां मानचिन्न भेटयलें. येवकार प्रदेश अध्यक्ष भारत बेतकेकार हांणी दिलो. सोयर्यांची वळख चंद्रहास दाभोलकार, भोवमान केल्ल्या मानेस्तांची वळख नारायण खोर्जुवेंकार, सोयर्यांक येवकार संजय विर्नोडकार, तुकाराम शेटगांवकार हांणी दिलो.
समारोपाच्या सत्रांत पत्रकार अवित बगळे आनी मुखेल सोयरे डॉ. गुरुदास नाटेकार हाजीर आशिल्ले.
पत्रकार आनी दिसाळीं हे समाजाचे मार्गदर्शक. पूण जायते फावट पत्रकारांचेर हल्ले जायत आसता, तेन्ना वेगळी परिस्थिती दिसता. ताका लागून सरकारान वेळार उपाय करचे आनी पत्रकारांक सुरक्षा दिवची, अशें बगळे हांणी म्हणलें.
डॉ. नाटेकार हांणी ह्या वेळार आपले विचार मांडले. डॉ. नाटेकर आनी अवित बगळे हांकां मानचिन्न भेटयलें. प्रदीप सावंत हांणी निवेदन जाल्यार निमाणें अध्यक्ष भारत बेतकेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
