भांगरभूंय | प्रतिनिधी
इंडियन प्रिमियर लिगेंत (आयपीएल) घरच्या मैदानाचेर अखेरचे मॅचींत चेन्नय सुपरकिंग्सान जबरदस्त प्रदर्शन केलें. महेंद्रसिंग धोनीच्या फुडारपणाखाला खेळपी चेन्नय सुपरकिंग्सान फायनलींत सुवात मेळयली. चार खेपेचो वस्ताद चेन्नय सुपरकिंग्सान क्वॉलिफायर एक मॅचींत सध्याचो वस्ताद गुजरात टायटन्साक 15 धांवड्यांनी हारयलो.
चेन्नय सुपरकिंग्सान पयलीं बॅटींग करतना निर्धारीत ओव्हरींनी 7 विकेटी वगडावन 172 धांवड्यो केल्यो. ताचो फाटलाव करतना गुजरात टायटन्साक सगल्यो विकेटी वगडावन 157 मेरेन मजल मारप शक्य जालें. अशे तरेन चेन्नय सुपरकिंग्सान विक्रमी 10वे खेपे आयपीएलाचे फायनलींत सुवात मेळयली.
चेन्नय सुपरकिंग्साच्या बॉलरांनी उत्कृश्ट बॉलींग घालून वृद्धिमान साहा (12) आनी हार्दिक पांड्या (8) हांकां पावर प्लेंत तंबूंत धाडले. फॉर्मांत आशिल्ल्या विजय शंकराक फाटीं दवरून गुजरातान दासून शनाकाक (17) मुखार धाडलो. पूण, ताका मोठे योगदान दिवपाक जमलें ना. रवींद्र जडेजान 11वे ओव्हरींत शनाकाक आनी डॅव्हिड मिलराक (4) बाद करून गुजराताक व्हड धपके दिले. जडेजान चार ओव्हरींनी 18 धांवड्यो दिवन 2 विकेटी घेतल्यो. धोनीन उपरांत दीपक चहराक बॉलिंगेक हाडलो. ताणें शुभमन गिलाक (42) बाद केलो. राहुल तेवतिया आनी विजय शंकर हांचेर पंगडाक जैत मेळोवन दिवपाची जापसालदारकी आशिल्ली. पूण, तिक्षणान उत्कृश्ट बॉलाचेर तेवतियाक (3) बाद केलो. तिक्षणान चार ओव्हरींनी 28 धांवड्यो दिवन 2 विकेटी घेतल्यो. चहरान 29 धांवड्यांनी दोन विकेटी मेळयल्यो.
गुजराताक 30 बॉलांनी 71 धांवड्यो करपाच्यो आशिल्ल्यो आनी ताच्या हातांत फकत चार विकेटी शिल्लक आशिल्ल्यो. मथिशा पथिराणाची दिशाहीन बॉलींग धोनीक घाम काडटना दिसली. तुषार देशपांडेन घाल्ले 17वे ओव्हरींत 19 धांवड्यो आयल्यो. ताका लागून मॅचींत उमळशीक वाडली. पथिराणान 18वे ओव्हरींत मोठी विकेट घेतली. ऋतुराज गायकवाडान विजय शंकराची (14) जबरदस्त कॅच धरली आनी मॅच चेन्नय वटेन घुंवली. फुडल्या बॉलाचेर दर्शन नळकांडे धांवबाद जालो. 12 बॉलांनी 35 धांवड्यांची गरज आसतना राशीद खानाचेर सगली भिस्त आशिल्ली. पूण, तुषारान 19वे ओव्हरींत राशिदाक बाद केलो. राशिदान 16 बॉलांनी 30 धांवड्यो केल्यो. मोहम्मद शमीन सको मारून मॅच 6 बॉलांनी 27 धांवड्यो अशी केली. पूण, गुजराताक आनीक 12 धांवड्यो करप शक्य जाल्यो आनी चेन्नय 15 धांवड्यांनी मॅच जिखलो.
ते पयलीं ऋतुराज गायकवाड (60) आनी डॅव्हॉन कॉन्वे (40) हांणी 87 धांवड्यांची भागिदारी करून चेन्नयक बरी सुरवात करून दिली. पूण, ऋतुराजाची विकेट पडल्या उपरांत गुजराताच्या बॉलरांनी पुनरागमन केलें. ताणें शिवम दुबे, अजिंक्य रहाणे हांकां बाद केले. अंबाती रायुडू (17) आनी रवींद्र जडेजा (22) हांणी अखेरच्या ओव्हरींनी आक्रमक बॅटींग करून चेन्नयचो स्कोर 7 बाद 172 मेरेन पावयलो.
महेंद्रसिंग धोनी 18वे ओव्हरींत आयलो आनी चेपॉक मैदानांचेर प्रेक्षकांनी जल्लोश केलो. पूण, धोनी एक धांवडी करून तंबूंत परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
