भांगरभूंय | प्रतिनिधी
भांगरभूंय । प्रतिनिधी
सांगेंः साळावली धरणाच्या उदकांत बुडल्ल्या आनी उदक देंवल्या उपरांत देड म्हयन्यो उदका भायर येवपी श्रीस्थ्ळ- कुर्डी हांगच्या श्री सोमेश्वर पिंडीचो वर्सुकी उत्सव फाटल्या आयतारा हजारांनी भाविकाचें हाजरेंत व्हडा उमेदीन मनयलो. सोमेश्वराचें स्वयंभू लिंग गांव बुडल्या उपरांत मूळ सुवाते वयल्यान व्हरपाक प्रसाद पाकळीचेर देवान न्हंयकार दिल्ल्यान फाटल्या 48 वर्सां सावन तें श्रीस्थळ हांगा मूळ सुवातेर आसा.
कुर्डी गांव धरणांत बुडल्या उपरांत गांवांतल्या कुटूंबाची सांगें तालुक्यांत वाडें आनी वालकिणी हांगा पुनर्वसणूक केली. बरेच लोक गोंयांत वेगवेगळ्या सुवातांनी राबितो करून आसात. फाटल्या आठ वर्सां सावन मे म्हयन्याच्या तिसऱ्या आयतारा सोमेश्वराचो वर्सुकी उत्सव मनयतात आनी सोमेश्वराचे भावीक व्हडा भक्तिभावान ताका हाजीर रावन आपल्या ग्रामदेवाचें दर्शन घेतात. कोरोना म्हामारीक लागून फाटल्या तीन वर्सां सावन व्हो उत्सव जावपाक शकलो ना. फाटल्या आयतारा जाल्ल्या ह्या उत्सवाक सुमार सात हजार भावीक श्रीस्थळ- कुर्डी हांगा आयिल्ले.
हेमंत कुर्डीकार, अजय कुर्डीकार आनी मनोज पर्येकार आनी हेर वांगड्यांची समिती उत्सव आयोजनाचें काम करतात. सकाळीं 8 वरांचेर उत्सवाक सुरवात जाता आनी सांजे 5 मेरेन तो सोपता. समिती वतीन सोमेश्वर दर्शनाक आयिल्ल्या भाविकांच्या म्हाप्रसादाची वेवस्था करतात. आप वावुरप्यांच्या पंगडान भाविकांची म्हाप्रसाद वितरण आनी हेर वेवस्था सांबाळली. श्रीमती आश्विनी श. जांबावलीकार आनी तिच्या शिश्यांनी ‘गंध चदंनााचा’ ही भक्तिगीत आनी भावगितांची कार्यावळ श्री सोमेश्वराक ओपली. सांगेचो थळावो आमदार आनी समाज कल्याण मंत्री सुभाष फळदेसाय आनी तांची घरकान्न अलका फळदेसाय हिणे सकाळीं येवन सोमेश्वराचें दर्शन घेतलें.
सोमेश्वर उत्सव समिती वतीन ऊबाठा शिवसेनेचो दक्षीण गोंय संपर्काधिकारी आनी कुर्डीचो सुपूत शशिकांत पर्येकार हांचे हस्तुकीं श्रीमती आश्विनी जांबावलीकाराचो भोवमान केलो. सोमेश्वराच्या पांया कडेन संगीत सेवा करपाची ही म्हजी चवथी खेप आसा. भोवमान खूब जाले मात सोमेश्वराच्या आवाठांत जाल्लो व्हो भोवमान सगल्यांत म्हत्वाचो अशें तिणे सांगलें. उत्सवाक पयलीं कुर्डी गांवात रावपी हिंदू तशेंच किरिस्तांव भाव मुजरत आयिल्ले. ताणी सोमेश्वराचें दर्शन घेवन आपल्या धरणांत बुडल्ल्या गांवच्यो यादी परत एक फावट जागयल्यो. येता त्या आयतार 28 मेक कुर्डी गांवात आशिल्ल्या त्या सेक्रेड हार्ट ऑफ जिजस चॅपेलाचें वर्सुकी फेस्त जातलें. ताकाय गांवचे लोक व्हडा संख्येन एकठांय येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
