भांगरभूंय | प्रतिनिधी
भांगरभूंय । प्रतिनिधी
फोंडेंः कुर्टी- खांडेपार पंचायत वाठारांत आनी फोंडें पालिका वाठारांत सुमार 10 लाख रुपये खर्च करून पावसा पयलींची कामां करपाक मंगळारा सुरवात केली. फोंडेचो नगराध्यक्ष रितेश नायक हांणे नाल्ल फोडून ह्या कामाक सुरवात करून दिली. ह्या वेळार फोंडेंचो आमदार आनी कृशी मंत्री रवी नायक आनी नगरसेवक हाजीर आशिल्ले.
बेतोडें हांगच्यान येववी व्हाळाची नितळसाण मेस्तवाडो ते खडपाबांद मेरेन करतले. ते खातीर सुमार 5 लाख रुपये खर्च येतलो. पंचमे हांगच्या तळयेची नितळसाणे खातीर 5 लाख रुपये खर्च येतलो. दोनूय कामां आठ दिसांत पुराय करतले. फाटल्या कांय वर्सां सावन ह्या व्हाळाचे नितळसाणेचें काम केलें ना अशी म्हायरी रवी नायक हाणे दिली.
कुर्टी- खांडेपार पंचायती खातीर नवें पंचायत घर बांदपाची प्रक्रिया सुरू केल्या अशें ताणे सांगलें. फोडें पालिकेच्या सगल्या प्रभागांनी पावसा पयलींची कामा सुरू केल्यांत. पावसाच्या दिसांनी मलेरिया,डेंग्यू सारकी दुयेंसा जावची न्हय हे खातीर लोकां मदी जाग्रुताय करपाचें काम करतले अशें नगराध्यक्ष रितेश नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
