विरोधी एकवटाचे फटकिरे ट्रेलर !

भांगरभूंय | प्रतिनिधी

लोकसभा वेंचणुको णव- धा म्हयन्यांचेर आसात. विरोधी म्हाएकवोटाची गाडी खरें म्हणल्यार बरीच फुडें वचपाक जाय आशिल्ली. लोकसभे खातीर भाजपाच्या विरोधांत थेट लडटी जावच्यो अशी प्रतिक्षा करतल्यां खातीर तरी हो सुदिन उदेतलोच, अशें सांगपा सारकी आयची परिस्थिती ना. कर्नाटक विधानसभा वेंचणूक काँग्रेसीन एकहाती जिखले उपरांतूय आयज विरोधी म्हाएकवोटा खातीरची चर्चा कांय फुडें सरकना ही वस्तुस्थिती. मात, विरोधी म्हाएकवोटाचे फटकिरे ट्रेलर मात कर्नाटका सावन महाराष्ट्र आनी थंयच्यान दिल्ली मेरेन प्रदर्शीत करून ते विशीं हवा तयार करपाचो यत्न मात जातना दिसता. हातूंतल्यान नेमके कितें साध्य जातलें हें काळूच सांगतलो आसलो तरी विरोधक एकठांय येवपाचे विसरपाक तर लागूंकना मूं, अशें चित्र मात दिसपाक लागलां. एकवटा खातीर ठोस आनी विधायक चर्चा कमी आनी देखावो चड जाता. कर्नाटक मंत्रिमंडळाच्यो सोपूत विधी वेळार केल्लें अशेंच प्रदर्शन कपिल सिब्बल सारक्या फुडाऱ्याक लेगीत चड मानवलें ना. हें ताणी उपरांत केल्ल्या विधाना वयल्यान दिसलें. विरोधकां खातीर सध्या फकत देखावो करून चलचें ना, जाल्ल्यार पक्क्या अजंडाची गरज आसा, अशें राज्यपाल खासदार कपिल सिब्बल हें सांगता जाल्यार आनीक कितें सांगपाचें. असो देखावो करपा परस विरोधकांनी पयलीं समान कार्यावळ निश्चीत करून थोडो तरी त्याग करपाची तयारी दवली जाल्यार तातूंत कितें तरी सादपाच्या गजालींची अपेक्षा करपाक मेळटली अशा उतरांनी सिब्बल हांणी कान पिळिल्ल्यान एकवटाच्या नांवां खाला फकत देखावे करतात, हेंच तांणी अधोरेखीत केलां.
कर्नाटक निकालान विरोधकां मदीं केन्नाच नाशिल्ली ती उमेद संचारल्या हें समजूपा सारकें आसा. मात, पांच वर्सां सावन जें करीत आयल्यात ताचीच पुनरावृत्तीच जर तुमी करपाचे आसात जाल्यार एकवटाची गाडी रुळां वयल्यान फुडें वतली कशी हें कळना. कर्नाटकांत सोपूत विधी वेळार विरोधी एकवटाच देखावो करपाचो जो यत्न जालो तो पळयल्यार फाटल्या वेळार आशिल्ल्या जायत्या फुडाऱ्यांची गैरहाजेरी चड प्रकर्शान दिसून आयली. विरोधी एकवटाचें अशें फटकिरें प्रदर्शन एकवटाच्या मुळार येवपाक शकता, हाचेंय भान जायत्या जाणां मदीं दिसून आयलें ना. विरोधी एकवटाच्यो गजाली करप आनी अरविंद केजरीवाल, ममता बॅनर्जी, अखिलेश यादव, उद्धव ठाकरे अश्या जायत्या फुडाऱ्यांनी ताचे कडेन फाट फिरोवप हातूंतल्यान एकूच स्पश्ट संदेश मेळटा तो म्हणल्यार विरोधक सध्याचे घडीक एकठांय येवप हें सामकें अशक्य आसा.
आता विरोधी एकवटाचे फटकिरे ट्रेलर प्रदर्शीत करून तातूंतल्यान कितें तरी साध्य जातलें अशें कोणाक दिसता जाल्यार तो ताचो भ्रम. बिहाराचे मुख्यमंत्री नितीशकुमार आनी लालूंचो चलो तेजस्वी यादव ही चाचा- भतिजा जोडी फाटले दोनेक म्हयने विरोधकांक जोडपाक भारत यात्रा करतात तरी अजून तांच्या हाताक कांयच लागल्लें दिसना. प्रधानमंत्रीपदा खातीर आपली खुटी हालोवन चड घट्ट करप हेंच एकसुरें उद्दीश्ट दवरून नितीशकुमार तेजस्वीचो आदार घेवन ही यात्रा करता. पूण ताणींय आतां सामके हात तेंकयल्यान, अशें दिसता. हालींच तांणी देशांतले सगल्यांत गिरेस्त आम आदमी आशिल्ल्या दिल्लीचे मुख्यमंत्री अरविंद केजरीवाल हांच्या तांच्या दिल्लींतल्या शीशमहलांत वचून तांचे कडेन चर्चा केली, पूण हे चर्चेची गाडी नेमक्या मुद्द्यार येवपा पयलींच रुळां वयल्यान निसरली. केंद्र सरकारान जारी केल्ल्या नव्या अध्यादेशाक लागून तयार जाल्ल्या पेंचात राज्यसभेंत सहकार्य करचें अशी मागणी करून केजरीवाल हांणी ही चर्चा सोंपयली आनी एकवटा वयले चर्चे खातीर फुडली तारीख दिल्ल्यान नितीशकुमार हांका कोणूय म्हणल्यार कोणूच गंभीरपणान घेनात हेंच परत एक फावट स्पश्ट जालें.
विरोधी म्हाएकवटाचे फटकिरे ट्रेलर सद्या वेगवेगळ्या माथाळ्या खाला जायते कडेन प्रदर्शीत जाल्यात. महाराष्ट्रांतली ‘वज्रमूठ’ हो लेगीत तातूंतलोच एक ट्रेलर, अशें म्हणपाक जाता. कर्नाटकांतल्या निकाला उपरांत पी. चिदंबरम सारक्या फुडाऱ्यांक भाजपाची डबल इंजीन गाडी रुळां वयल्यान निसरून पडपाक लागिल्ल्याचीं सपनां लेगीत पडटात, मात विरोधी एकवटाची गाडी कूसभर लेगीत फुडें गेली ना, हें मात दिसना. महाराष्ट्रांत जाल्यार कर्नाटकांतल्या निकालाक लागून महाविकास आघाडींत बिघाडी चड जाल्ल्याचें घटक पक्षांतल्या फुडाऱ्यां मदीं चालू आशिल्ल्या शाब्दिक झुजांतल्यान स्पश्ट दिसपाक लागलां. उद्धव ठाकरे हांचे कडेन काल- पयर मेरेन व्हडलो भाव म्हणून पळयताले. आतां अजीत पवार हांणी स्पश्ट शब्दांतल्यान राष्ट्रवादी काँग्रेस होच व्हडलो भाव आशिल्ल्याचें नेटान सांगलां. कर्नाटकांतल्या निकाला उपरांत नाना पटोले हांणीय काँग्रेस पक्ष होच व्हडलो भाव आशिल्ल्याचें सांगल्यार तातूंत अजाप दिसपाचें कारण ना. भाजप विरोधांत महाराष्ट्रात महाविकास आघाडीन ‘वज्रमूठ’ आवळ्ळ्या हें जरी खरें आसलें तरी ती मूठ कितली मेरेन तिगतली हाचो दुबाव येवचो अश्यो गजाली थंय घडपाक लागल्यात. दरेक घटक पक्षाचो फुडारी मनांत येतां तें उलयतना दिसता आनी आमचे संजय राऊत हे जाल्यार तातूंत सगळ्यांत आघाडेर आसात. उबाठा शिवसेनेक लोकसभेच्यो 19 सुवातो दिवच्यो पडटल्यो हें तांचे विधान महाविकास आघाडेंतल्या हेर पक्षांक मानवूंक नाशिल्ल्यान तांच्या फुडाऱ्यांनी प्रतिटोला मारप साहजीक आसा. लोकसभेच्यो सुवातो वांटपा वयल्यान नेटान रस्सीखेच चालू आसतना दरेकलो आपल्याक बरें पडटा तितलेंच जाहीरपणान उलयत आशिल्ल्यान आघाडे खातीर नव्यो समस्या तयार जावपाक लागल्यात.
लोकसभा वेंचणुकां खातीर सुवातो वांटप हो कळीचो मुद्दो थारतलो. ताचे वयल्यान महाविकास आघाडींत महाबिघाडीचें रिगप जातले हे विशीं जायत्या फुडाऱ्यांची विधाना पळयल्यार कोणाकूच दुबाव दिसना. आघाडेतले तिनूय घटक पक्षांचे फुडारी आतांच सुवातो वांटपा वयल्यान इतले आक्रमक जाल्ले दिसतात की तारीख लागीं येय मेरेन ते एकमेकांचे छातयेर बसून फुडें वचपाक पळोवचे नात अशें म्हणपाचें धाडस जावचें ना. आतां भाजपाच्या विरोधांत एकल्याक एक उमेदवार दिवपाचो म्हणल्यार अशे एकमेकाचें पांय ओडून तें साध्य कशें कितें जातलें, हो लाख मोलाचो प्रश्न आसतलो. ऊबाठा शिवसेनेन आपले तीन उमेदवार उबारून व्हेल्ल्याचो आरोप करून नाना पटोलेन हाचे पयलींच तांकां दम दिला. जाल्यार काँग्रेसीची कोंडी करपाचे योजनाबद्ध यत्न हेर घटकां कडल्यान जातात, कांय मतदारसंघाचेर जाल्यार तिनूय घटक पक्ष दावो करपाक लागल्यात. अशे परिस्थितींत वज्रमूठ कायम रावल्यार तो एक राजकी चमत्कार थारतलो. शिवसेनेच्या खासदारांतले फकत पांचूच ऊबाठा कडेन आशिल्ल्यान हेर तेरा मतदारसंघांत एकनाथ शिंदेक शह दिवपा खातीर काँग्रेस वा राष्ट्रवादीचे उमेदवार पळोवन व्हरपा कडेन तांचो कल दिसता आनी ताचे वयल्यान महाराष्ट्रांत आघाडेंत तू तू मै मै जावपाक लागलां. कर्नाटक निकालान काँग्रेच चडूच आक्रमक जाल्या आनी स्वबळग्यार वेंचणूक लडोवपाचो निर्णय तांणी घेतल्यार ताचें अजाप दिसपाचे कारण ना.
विरोधी म्हाएकवोटाचें फटकिरे ट्रेलर आतां सगळे कडेन प्रदर्शीत जावपाक लागल्यात. मात तातूंत सकारात्मक असो संदेश लोकां मदीं गेल्लो दिश्टी पडना. फकत देखाव्यांनी मतदार आतां फटवचो ना. उक्ती आनी कृती हातूंत मेळ घालून विरोधकांक फुडें वच्चें पडटलें आनी ते खातीर तांचे कडेन आता जाय तितलो वेळून ना.

वामन प्रभू
9823196359