भांगरभूंय | प्रतिनिधी
भांगरभूंय । खबरां मेज
पणजीः रिलायन्स फावंडेशन 27 राज्यांतल्या 5000 विद्यार्थ्यांक शिश्यवृत्ती दितलें. पदवेच्या पयल्या वर्साच्या ह्या विद्यार्थ्यांक तांच्या अभ्यासा मजगतीं सुमार 2 लाख रुपये दितले. रिलायन्स फावंडेशनान डिसेंबर 2022 जाहीर केल्लें कीं ते फुडल्या 10 वर्सांत 50 हजार शिश्यवृत्ती दितलें. शिश्यवृत्ती वांगडा निवड जाल्ल्या विद्यार्थ्यांक आदल्या विद्यार्थ्यांच्या नेटवर्का कडेन जोडटले.
रियायन्स फावंडेशनाचो सीईओ जगन्नाथ कुमार हांणे सांगलें कीं, आमकां आस्ता आसा की रिलायन्स फावंडेशन शिश्यवृत्ती तरणाट्यांच्या सपनांक पांखा दितली. भारताच्या वेगवेगळ्या भुगोलीक वाठारांत वेगेवगळ्या विशयाचों अभ्यास करपी विद्यार्थ्यांतल्यान शिश्यवृत्तीची निवड करतात. चले आनी चलयांक सारकें प्रतिनिधीत्व दिलां. वेंचून काडिल्ल्या विद्यार्थ्यांक आमी परबीं भेटयतात ते देशाचे प्रगतींत योगदान दितले अशें ताणे सांगलें.
रिलायन्स फावंडेशन अंडरग्रेज्युएट शिश्यवृत्ती विद्यार्थ्यांची गुणवत्ता आनी अर्थीक स्थितीच्या आदारा वयल्यान दितात. ह्या वर्सा खातीर वेंचून काडिल्ले विद्यार्थी अभियांत्रिकी- तंत्रगिन्यान, विज्ञान, वैजकी, वाणिज्य. कला, वेवसाय- वेवस्थापन, संगणक, कायदो आनी वास्तुकला ह्या मळावयले आसात. सत्र 2022-23 खातीर 4,984 शिक्षणीक संस्थांनी शिकपी सुमार 40 हजार अर्जांतल्यान 5 हजार विद्यार्थ्यांक वेंचून काडलां. तातूंत 51 टक्के चलयो आनी 99 दिव्यांक विद्यार्थ्यांक शिश्यवृत्ती फावो जाल्या. निवड जाल्ल्या विद्यार्थ्यांक तांचे निवडीची थेट म्हायती दितले वा तांकां www.reliancefoundation.org हे वेबसायटीचेर निकाल पळोवपाक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
