भांगरभूंय | प्रतिनिधी
भांगरभूंय । प्रतिनिधी
पोरणे गोंयः पंचायत कार्यालया कडेन छत्रपती शिवाजी म्हाराजांच्यो पुतळो उबारपा वयल्यान सां मातियश पंचायत ग्रामसभेंत दोन गटां मदीं बरीच तापातापी जाली. कांय ग्रामस्थानी बेकायदेशीर बांदकामां विशीं न्यायालयात निकाल दिवचे पयली पंचायत मंडळान कसलींच काम हातांत घेवचीं ऩ्हय अशी मागणी करपी प्रस्ताव सादर केलो आनी बोवाळाक सुरवात जाली.
दुसऱ्या गटात ताकां आक्षेप घेतलो. विशय शिवाजी पुतळ्या कडेन संबंदीत आशिल्ल्यान आनी तो न्यायप्रविश्ट आशिल्ल्यान ताचेर ग्रामसभेंत कसलीच चर्चा जावपाक जायना अशें तांणी सांगलें. शिजाची पुतळ्या कडेन संबंदीत आशिल्लें प्रकरण न्यायालयांत आसताना पंचायत मंडळान कसलींच कामा करची न्हय अशें सांगपाचें प्रयोजन कितें हें स्पश्ट करपाची मागणी तांणी केली.
पंचायत मंडळान पुतळो बांदकामाक आक्षेप घेवपी गटाजी बाजू घेवन नवे पंचायत घर बांदकामाक पुतळ्याची आडखळ जातली अशें सांगलें. बरीच वादावादी जाल्या उपरांत पंचायत घराक आमचो आक्षेप ना. आक्षेप आसा तो शिवाजी पुतळ्या सरभोंवतणी बांदकाम करपाक अशें पयल्या गटान सांगलें. न्यायालयीन निकाला मेरेन शिवाजी पुतळ्या कडेन पंचायत कसलेंच काम करची ना असें सरपंच सुप्रिया तारीन बसके उपरांत पत्रकारांक सांगलें.
पुतळ्या पयलीं दिवाडेच्या लोकांक पुलाची गरज आसा अशें चिलिया सावंत हाणे सांगलें. पावसाच्या दिसांनी पूल नाशिल्ल्यान विद्यार्थी. कर्मचारी आनी साबार लोकांक सामके त्रास जातात. पूल बांदपाक प्राधान्य दिवपाक जाय आनी लोकांची पुलाची मागणी आसा ती पंचायत मंडळान पुराय करपाक जाय अशे ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
