भांगरभूंय | प्रतिनिधी
भांगरभूंय । प्रतिनिधी
फोंडेंः दुरुस्ती खातीर बंद केल्ल्या फोंडेंच्या कदंब बसस्टॅण्डाचें काम जे गतीत चल्लां तें पळयल्यार पावसा पयलीं तें पुराय जावपाची शक्यताय ना. हें काम पावसाक सुरवात जावचे पयलीं पुराय करपा खातीर राज्याचे मुख्य सचीव तशेंच कदंब म्हामंडळाक निवेदन दितले अशें गोवा फॉरवर्डाचे सरचिटणीस दुर्गादास कामत हाणे सांगलें.
फोंडें कदंब बसस्टॅण्डाची सामकी अवतिकाय जाल्या. भाजपा सरकारान इव्हेंन्टांचेर पयशे खर्च करनास्तना लोकांच्या हिताची कामां बेगोबेग पुराय करपाची गरज आसा. फोंडें तालुक्यांतल्या चार मंत्र्यांनी हातूंत लक्ष घालपाची गरज आसा. मुख्यमंत्री प्रमोद सावंत हांणी ह्या बसस्टॅण्डाची पळोवणी करपाची गरज आसा. थळावे तशेंच हेर राज्यांतल्या प्रवाश्यांक बसस्टॅण्डार बसपाची वेवस्था ना. ह्या बॅसस्टॅण्डा वयल्यान जायत्यो बशी गोंयच्या वेगवेगळ्या वाठारांत वतात. सरकार इव्हेन्टांचेर कोट्यांनी रुपया खर्च करता मात लोक सुविधा प्रकल्पांचेर खर्च करपाक ताचे कडेन पयशे आसनात अशें कामत हांणे सांगलें.
रोखडेंच गोय विधानसभा अधिवेशन सुरू जातलें तेन्ना गोंय फॉरवर्डाचे आमदार विजय सरदेसाय हे संबंदी प्रश्न मांडटले. फकत वेंचणुके वेळार लोकांक हांयसां दाखोवन मतदारांक आकर्शीत करपाचें काम सरकारान बंद करपाक जाय. साबार लोकांक बसस्टॅण्डाची सुविधा दिवपाची खरी गरज आसा. ताका लागून पावसा पयलीं फोंडें बसस्टॅण्डाचे काम पुराय जावपाची गरज आसा असें कामत हाणे सांगलें.
.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
