भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मंडळान अतिक्रमण हटाव मोहीम परत सुरू केल्या. पालिका प्रशासन संचालकांन मोहिमेक मनाय करपाचो आदेश दिलो आसतनाय पालिका कर्मचाऱ्यां कडल्यान माल आनी साहित्य जप्त करपाचें काम सुरू आसा.
म्हापशें शारांत रस्त्या कुशीकच्या फूटपाथांचेर अतिक्रमण करून सुरू केल्ल्या वेवसायांचेर पालिका मंडळान फाटल्या 10 मे सावन कारवाय सुरू केल्या. ते खाताल पालिका कर्मचारी अतिक्रमण करून थंय दवोरल्ल्या सगल्या तरेच्या साहित्याचेर कारवाय करूनतें जप्त करतात.मात गाडे वा दुकानांचेर बेकायदेशीरपणान वाडयिल्ली वा घातिल्ली पत्र्याची शेडींक मात हे कारवायेंतल्यान मेकळीक दिल्या. कारवाये वेळार पालिका कर्मचाऱ्यां कडल्यान बायल वेवसायिकांक धक्काबुक्की करपाचे प्रकार घडल्यात. मोहीम सुरु करतना जप्त केल्ल्या,सामानाची नोंदणी करतात.
अॅड महेश राणे हांणी म्हापशें मुख्याधिकाऱ्याचे हे कारवायेक विरोध करपी याचिका पालिका प्रशासन संचालकाक सादर केल्या. मनमानी पद्दतीन आनी फोर्स वापरून ही कारवाय करतात, ती करतना जप्त केल्ल्या सामानाचो पंचनामो वा वळेरी तयार करनात असो दावो अॅड राणे हाणे केल्लो. पालिका संचालकान ही मोहीम अनधिकृत थारावन सामान जप्त करचो न्हय असो आदेस 16 मेक दिल्लो. पालिका मुख्याधिकाऱ्यांक जाप दिवपाचो आदेश लेगीत ताणे दिल्लो.
अॅड राणे हांणे पालिकेची अतिक्रमण हटाव मोहीन पालिका संचालकाच्या आदेशाचें उल्लंघन करपी आशिल्ल्यान ते खातीर पालिका मंडळा आड अवमान अर्ज सादर करतलों अशें सांगलां.
म्हापशें पालिकेचें प्रशासकीय कामकाज नगरसेवक काय मुख्याधिकारी पळयतात हेंच समजना. अतिक्रमण हटाव तशेंच प्रशासकीय कामकाजांत पालिका मंडळाचो थेट हस्तक्षेप चल्ला. म्हापश्यांतले नगरसेवक हेच सध्या पालिकेचे प्रशासकीय अधिकारी जाल्यात. मुख्याधिकाऱ्याक शारांत मोहीम सुरू करपाक भिरांत दिसता देखून ताणे आपले अधिकार नगरसेवकाच्या हातांत दिल्यात काय कितें असो प्रश्न उपस्थीत करून अॅड राणे हांणी पालिका मुख्याधिकारी आनी पालिका मंडळाचेर कारवाय करपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
