भांगरभूंय | प्रतिनिधी
पर्यें मतदारसंघ क्रिकेट सर्तः साई बॉयज पिसुर्लें उपवस्ताद
भांगरभूंय । प्रतिनिधी
वाळपयः पर्यें मतदारसंघा खातीर आयोजीत केल्ले खासदार करंड सर्तींत कॉलनी स्टार्स मोर्लें पंगड जैतिवंत थारलो. जाल्यार पिसुर्लें साई बॉयज पंगड उपवस्ताद थारलो.
पर्यें सत्तरीच्या भुमिका मैदानाचेर खासदार क्रिकेट सर्तीचें आयोजन केल्लें. हे सर्तींत वट्ट 15 पंगडांनी वांटो घेतिल्लो. फाटल्या तीन दिसां सावन ही सर्त ह्या मैदानाचेर खेळयिल्ली. सर्तीचें उक्तावण पर्येची सरपंच रती गांवकार, जिल्हो पंचायत वांगडी देवयानी गांवस, राजश्री काळे आनी हेर मानेस्तांचे हाजिरेंत केल्लें.
वस्तादपणा खातीर कॉलनी स्टार्स मोर्लें आनी साई बॉयज पिसुर्लें हांचे मदीं अटीतटीची लडत जाली. अखेर कॉलनी स्टार्स मोर्ले पंगडान साई बॉयज पंगडाचेर जैत मेळोवन करंडकाचेर आपलें नांव कोत्रायलें. उत्कृश्ट बॅट्समन म्हूण प्रवीण मोर्ले राणे (मोर्लें पंगड) आनी मॅन ऑफ मॅच पुरस्कार शिवनाथ हाका भेटयलो.
सर्तीच्या इनामां भेटवण सुवाळ्याक पर्यें मतदारसंघाची आमदार डॉ. देविया राणे, उत्तर गोंय जिल्हो पंचायत अध्यक्ष सिद्धेश नायक, भाजपा युवा मोर्चाच अखील पर्रीकार, पर्येंची सरपंच रती गांवकार, उपसरपंच आत्माराम शेट्ये, मतदारसंघाचे भाजपाचे संघटक विनोद शिंदे, पंच हेमंत राणे, विदिशा गोसावी, दीपा नायक, अमिषा गांवकार, लक्ष्मीकांत शिरोडकार, रुचिता माईणकार, शब्बीर जमादार, विरेंद्र माजीक हाजीर आशिल्ले.
उत्तर गोंयच्या दरेका मतदारसंघांत खासदार श्रीपाद नायक हांच्या फुडाकारान खासदार करंडक सर्तीचें आयोजन केलां. हे सर्तीच्या माध्यमांतल्यान मतदारसंघांतल्या दरेका खेळगड्याक आपलो खेळ दाखोवपाची संद मेळ्ळ्या. ताका लागून खेळगड्यां मदीं खेळाचें म्हत्व वाडला. तरणाट्यांनी मैदानार देंवून आपले कुशळटायेक वाट मेकळी करून दिवपाचो खासदार श्रीपाद नायक हांचो वावर खऱ्यांनीच तोखणायेचो आसा. अशा सर्तींच्या माध्यमांतल्यान तरणाट्यांक एकसंघ करपाची संद मेळटा. फुडारांतूय अशे तरेचे उपक्रम चालीक लावचे, अशी विनवणी आमदार डॉ. राणे हांणी केली.
सिद्धेश राणे हांणी सांगलें, दरेका मतदारसंघांत आयोजीत केल्ले खासदार करंडक सर्तीक बरो प्रतिसाद मेळ्ळा. खेळगड्यां मदीं चैतन्य निर्माण जालां. श्रीपाद नायक हांणी गांवगिऱ्या वाठारांनी लेगीत उदरगतीची गंगा पावयल्या. आयज ग्रामीण वाठारांतले उदरगतींत श्रीपाद नायक हांचें योगदान म्हत्वाचें आसा. फुडारांत तरणाटयां खातीर वेगवेगळे तरेचे उपक्रम चालीक लावपाचो विचार आसा, अशें तांणी सांगलें.
जिल्हो पंचायत निधीच्या माध्यमांतल्यान गांवगिरे उदरगतीक बरे तरेन चालना मेळटा. ताका लागून पंचायतीच्या माध्यमांतल्यान दरेका वाठारांत उदरगतीच्या प्रस्तावांक मातूय कळाव लावचे नात, अशेंय तांणी ह्या वेळार सांगलें.
रती गांवकार हांणी सांगलें, अशे तरेची सर्त पर्यां आयोजीत केल्ले खातीर आयोजकांचे आनी भाजपाचे उपकार. हे सर्तीच्या निमतान पर्यें मतदारसंघातल्या वट्ट 15 पंगडांनी वांटो घेतलो. भाजपाच्या उपक्रमाक लागून व्हड प्रमाणांत खेळगडे मैदानार देंवले हाचें कवतूक दिसता. ह्या वेळार अखील पर्रीकार हांणीय विचार मांडले. विरेंद्र माजीक हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
