भांगरभूंय | प्रतिनिधी
अभयारण्य वाठारांत चलतालें बेकायदो प्लॉट करपाचें काम; थळाव्या लोकांनी घेतलो फुडाकार
भांगरभूंय । प्रतिनिधी
वाळपयः नगरगांव पंचायतींतल्या ब्रह्मकरमळी वाठारांत चलिल्लें बेकायदो दोंगर कांपपाचें काम थळाव्या लोकांनी बंद उडयलें.
दोंगर कांपून थंय प्लॉट करून ते विकपाचो यत्न जमीन धनयान केल्लो. ताचो हो यत्न पुराय बेकायदो आसा, कारण जंय दोंगर कापताले तो भाग म्हादय अभयारण्य वाठारांतलो संवेदनशील वाठार आसा. खंय कसलेच तरेचें खणपाचें काम करपाक मेळना. तरी लेगीत जमीन धनयान जेसीबी मशिनाचो वापर करून प्लॉट करपाचे यत्न चलयिल्लें.
सत्तरी म्हालांत प्लॉट करून जमीन विकपाचें सत्र सुरू जालां. रोखड्या रोखडे पयशे करपाचें सादन म्हूण जमनीचे प्लॉट करून विकतात. हाचेर संबंदीत यंत्रणेन बारीक नदर दवरपाची गरज आशिल्ली. मात संबंदीत खात्याची यंत्रणा ह्या प्रकारां कडेन आडनगर करता, असो आरोप नेमान थळावे लोक करतात. नगरगांव पंचायतींत ब्रह्मकरमळी वाठारांत एका दोंगराचेर प्लॉट करपाचें काम सुरू आसा, थेंय जेसीबी मशिना वरवीं व्हड प्रमाणांत झाडां मारतात, अशी खबर कळटाच ब्रह्मकरमळीचे लोक ते सुवातेर गेले आनी तांणी बेकायदो काम आडायलें.
मेळिल्ले म्हायती प्रमाण ब्रह्मकरमळी वाठारांत एका कुटुंबाची जमीन आशिल्ली. ती जमीन त्या कुटुंबान एकल्याक विकली. ते जमनीचेर जमीन धनयाक घर बांदपाक मेळटा, पूण ते जमनीचे प्लॉट करून विकपाक मेळना. अशें आसून लेगीत त्या जमीन धनयान ते जमनीचेर बेकायदो प्लॉट करून विकपाक सुरवात केल्या. हे आदीं चार बेकायदो प्लॉट करून ते तांणी विकल्यात. नगरगांव पंचायतीन घर नंबर लेगीत दिल्यात. ते घर नंबर पुराय बेकायदो आसात. आतां परतून एकदां प्लॉट करपाचो यत्न चल्ल्यात. 21 मेक सकाळीं जेसीबी मशिना वरवीं काम सुरू आशिल्ल्याची म्हायती मेळटाच थळाव्या लोकांनी थंय वचून ह्या कामाक खर विरोध केलो आनी तें काम आडायलें.
हे विशींची खबर म्हादय अभयारण्य परिक्षेत्राच्या अधिकाऱ्यांक दिली. तशेंच पुलिशेक हे संबंदान कळयलें. हाची विशेश दखल घेवन अभयारण्याचे अधिकारी आनी पुलीस घडणुकेचे सुवातेर दाखल जाले आनी तांणी काम बंद करपाचे निर्देश दिले.
जंय प्लॉट मारपाचें काम सुरू आशिल्लें ती जमीन अभयारण्य परिक्षेत्रांतल्या संवेदनशील वाठारांत येता. थंय कसलेच तरेचें खणपाचें काम वा झाडां मारप बेकायदो आसा. हाचे आड खर गुन्यांव नोंद जावं येता. ताका लागून फुडारांत अशे तरेच्यो घडणुको घडल्यो जाल्यार ताची गंभीर दखल घेतले. तशेंच संबंदितांचेर खर करवाय करपाची मागणी थळावे लोक करतले, अशी म्हायती थंय हाजीर आशिल्ल्या लोकांनी दिली.
मजगतीं, जंय बेकायदो प्लॉट करपाचें काम सुरू आशिल्लें तो वाठार नगरगांव पंचायतींत येता. ताका लागून नगरगांव पंचायतीन हातूंत गांभिर्यान लक्ष दिवप तितलेंच गरजेचें आसा, अशें थळाव्या लोकांनी म्हणलां. जर हे बाबतींत नगरगांव पंचायत आडनदर करता, अशें कळ्ळें जाल्यार नगरगांव पंचायतीचेर मोर्चो व्हरपा बगर दुसरो कसलोच पर्याय शिल्लक उरचो ना, अशी शिटकावणी थळाव्या लोकांनी दिल्या.
मजगतीं, थळाव्या लोकांची आक्रमक भुमिका पळोवन सध्या तरी प्लॉट करपाचें काम संबंदितान बंद केलां. तशेंच हे आदीं जे चार प्लॉट करून विकल्यात आनी तांकां जे घर नंबर दिल्यात ते ताकतिकेन फाटीं घेवचे, ना जाल्यार खर परिणामांक फुडो करचो पडटलो, अशें थळाव्या लोकांनी म्हणलां.
बिगर गोंयकारांची वस्ती तयार जावपाची शक्यताय
सत्तरी म्हालाच्या साबार वाठारांनी बेकायदो दोंगर कांपून प्लॉट करून विकपाचो वेवसाय नेटान चल्ला. चड पयशे मेळटात म्हूण ते प्लॉट थळाव्यांक दिनासतना बिगर गोंयकारांक दितात. हाका लागून फुडारांत बिगर गोंयकारांची वस्ती उबी रावतली. ब्रह्मकरमळीच्या लोकांनी बेकायदो प्लॉट करपाचें काम आडावपाचें धाडस कवतुकाचें. सत्तरी म्हालाच्या ज्या पंचायत वाठारांनी अशे तरेन बेकायदो प्लॉट करून विकपाचे यत्न ताकतिकेन बंद जावचे ना जाल्यार थंय लेगीत थळावे लोक आक्रमक भुमिका घेतले, अशी प्रतिक्रिया कांय जागरूक नागरिकांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
