भांगरभूंय | प्रतिनिधी
फाटल्या एका लेखांत आमी स्टार्ट अपाची म्हायती दिल्ली. आतां गोंयांनूच जांणी हांचो लाव घेतला अशा उमेदवाराचो म्हायती घेवया. बऱ्याच वेळार एखादी येवजण सुरु जाता, पूण तिचो कोणें लाव घेतला हें कळना म्हूण अशा उमेदवारांक खास करून गोंयांतल्या उमेदवाराक आमी सोदून काडले. अर्थात हे खातीर सिबाचे आदले अधिकारी रघुवीर महाले हांची खूब मजत जाली. कायदो शिक्षण पुराय केल्लें गौतमी रायकार हाणें स्टार्ट अपची म्हायती दितना सांगलें, हातूंतल्या कायदो विशयाची गरज लक्षांत आयली आनी ताचेर अभ्यास करून स्वताचो स्टार्ट अप सुरु केलो. एक वेगळो गरजेचो विशय पूण तिणें हाताळ्ळो. आयज ताची सेवा जायते जाण घेतात.
गौतमीबायन हेर फाट्यांनी वचनासतना कायदो शिक्षणाची वाट धरली. खरेंतर वकील जातकूच ताचे कडेन जायत्यो केशी आयल्यो. पूण एक दीस सिबा सारके पेजाद कंपनींत नोकरेची संद मेळ्ळी. हेच संदीन ताका दुसऱ्यांक नोकरी दिवपाची संद स्टार्ट अप येवजणेन दिली. मडगावच्या कारे कायदो कॉलेजांत शिक्षण जातकीच ज्येष्ठ वकील प्रकाश प्रभुदेसाय हांचे हाता खाला वकिलीचो अणभव घेतलो. त्याच वेळार ताका सिबा तांत्रिक बिजनेस इन्क्युबरेटर फाट्यात ताका नोकरी लागली, ह्या फाट्यान ताका नवे स्टार्ट अप सुरु करपी उमेदवाराक कायद्याचे नजरेन मजत करपाची संद दिली. स्टार्ट अप सुरु करतना कायद्याच्यो कितें अडचणी येवं शकतात, हाचो अभ्यास ताणें केलो तेन्ना लक्षांत आयले की कायद्याचे नजरेन अशा उमेदवारांक बरीच जागरूकताय आसपाक जाय. कित्याक तर सगळ्या कडे कायद्याची म्हायती आसतली, अशें ना. हेच गरजेंतल्यान लोमेट हो स्टार्ट अप जल्माक आयलो. गौतमीचे कल्पनेक विद्या विकास मंडळाचे नितीन कुंकळेकार तशेच सिबाचे सीईओ अमेय करमली, तशेंच आई, बाबा, भयण हांणी खूब मजत केली. आपल्या स्टार्टअपाक फाव ती वेबसायट करपाक आवयन आपली सगळी बचत गौतमीच्या स्वाधीन केली.
एकदा स्टार्ट अप सुरु जालो की तो वयल्या पांवड्यार पावचो, बरो चलचो हो ताण आसताच. कसल्याय कामाक परिश्रम आनी सातत्य जायच. गोंय सरकार हाच्या खातीर खास येवजण चालीक लायल्या. ताचो उपेग करचो अशा स्टार्ट अपान दुसऱ्याक काम दिवपाचें समाधान मेळटा तें वेगळें. हालींच्याच दिसांनी लागीं- लागीं 347 कोटींच्या धा प्रकल्पाक गोंय सरकारान मंजुरी दिल्या. हातूंत 3500 नोकरेच्यो संदी मेळटल्यो. ह्या प्रकल्पां भितर कसल्यो ना कसल्यो अडचणी येवं शकतात. ताचेर तुमी स्टार्ट अपांतल्यान विचार करून त्यो तुमी योग्य अधिकाऱ्यां कडेन मांडू शकतात. हे खेरीज कितलेशेच प्रस्न आमकां दिसतात. ताचो खोलायेन विचार करून ताचेर स्टार्ट अपाच्या माध्यमांतल्यान उपाय मेळूं शकतात काय? हांचो विचार ह्या फाट्यान येवपी नव्या उद्येजकांनी जरूर करचो.
गौतमीबायन कायद्याचे नजरेन विचार केलो तसो तुमी दुसरे वाटेन विचार करूं शकतात. हाका निरीक्षण जशें गरजेचें तशे संवाद सादपूय गरजेचो. हातूंतल्यान तुमकां कितल्योशोच कल्पना हाताक लागू शकतात. शिक्षका पासून तुमी आम आदमी लागीं, उद्योजका सावन एखादो नोकरेक वचपी तरणाटो, ज्येश्ठ मनशा मेरेन, अशा सगळ्यां कडेन तुमी जरूर संवाद सादचो. एक लक्षांत घेयात की तुमी हातूंतल्यान दुसऱ्याक रोजगाराची संद तर दितलेच, खेरीज जर प्रस्नाक हात घालो तर कितल्याश्याच जाणांचे आशिर्वाद तुमकां मेळटले, ताचो हिशोब ना. जेन्ना आमी नोकरी करतात तेन्ना आमी फक्त आमचो आनी आमच्या कुटुंबाचोच विचार करतात ही मानसिकताय पयस करून दुसऱ्याचो विचार करूया. ते खातीर स्टार्ट अप तुमकां निश्चितच लाभदायी थारतलें, हातूंत दुबाव ना. एक म्हळ्यार तुमी जो वावर करतले तो प्रदुशणाक वाव दिना म्हळ्यार इको मित्रसो आसा. स्टार्ट अप तुमका तुमचे परीं उबे रावपाक मजत करतलें. हाचे खातीर अभ्यास मात करात आनी खूब मेहनत घेयात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
