भांगरभूंय | प्रतिनिधी
पणजीः जी 20 च्या चवथ्या पर्यटन कार्यगटाचे बसकेक येवपी निमंत्रीत प्रतिनिधीं खातीर जी 20 गोवा आनी भारतीय पुरातत्व विभागाचे गोंय परिमंडळ हांचे वतीन एके विशेश भोंवडी उपक्रमाचें आयोजन करतले. गोंयांतलें इतिहासीक थळां आशिल्लीं पोरणें गोंयची तीन स्मारकां थळां आनी पुरातत्व विभागाचें संग्रहालय ह्या थळांक भेट दिवन ह्या प्रदेशांतल्या गिरेस्त सांस्कृतीक दायजाचो अणभव 22 जूनाक आयोजीत केल्ले भोंवडेंतल्यान प्रतिनिधींक मेळटलो.
ही भोंवडी सोंपी आनी किटकिटीची आसची न्हय, ह्या निकशांचेर हे भोंवडे खातीर भेट थळांची निवड केल्या.
गोंयांतली चर्च आनी कॉन्व्हेंट ह्या थळांचो युनेस्कोच्या संवसारीक दायज थळांत आस्पाव केला. ह्या दायज थळाचें म्हत्व पळोवन भारत सरकारान जी 20 प्रतिनिधींचे भेटी खातीर ह्या थळाची निवड केल्या.
दायज थळां आनी संग्रहालय भेटीचो एक भाग म्हूण जी 20 चे प्रतिनिधी मंडळ पोरणें गोंयची बॅसिलिका ऑफ बॉम जिझस, सेंट कॅथ्रेडल, सेंट फ्रांसीस ऑफ असिसी चर्च, गोंय पुरातत्व संग्रहालय ह्या इतिहासीक नदरेन म्हत्वाच्या थळांक भेट दितले.
दरेकी 45 प्रतिनिधींचो एक गट ह्या प्रमाण तीन गट हे भोंवडेंत वांटो घेतले. पयल्या गटाची भोंवडी सकाळीं 10 वरांचेर, दुसऱ्या गटाची 10.30 आनी तिसऱ्या गटाची भोंवडी 11 वरांचेर सुरू जातली.
जी 20 गोवाचे नोडल अधिकारी संजीत रॉड्रिग्ज हांणी हे विशीं सांगलें, जी 20 बसकांचें आयोजन करपा वांगडाच जी 20 निमंत्रीत प्रतिनिधींक इतिहास, दायज आनी संस्कृती संबंदांत गोंयची सुवात तशेंच म्हत्व कितलें व्हड आसा हाची जाणीव करून दिवप तितलेंच गरजेचें आसा.
दरेका गटाची भोंवडी सुमार 2 वरां चलतली. दरेका प्रतिनिधीक ह्या दायज थळांचें वेवस्थीत दर्शन घेवन थंयचें इतिहासीक तशेंच वास्तूकलेचें म्हत्व समजून घेवपाक मेळटलें, अशी म्हायती भारतीय पुरातत्व सर्वेक्षण गोंय परिमंडळाचे अधिक्षक पुरातत्व तज्ञ हेमसागर ए. नायक हांणी दिली.
भारत सरकाराच्या पर्यटन मंत्रालया खाला आशिल्ले इंडिया टुरिझम संस्थे वतीन परवानो दिल्ले प्रादेशीक पांवड्या वयले मार्गदर्शन जी 20 प्रतिनिधी मंडळा वांगडा उपलब्ध आसतले. ह्या सगळ्या मार्गदर्शकां खातीर पाटो पणजेच्या पर्यटन भवनांत भारतीय पुरातत्व सर्वेक्षण गोंय परिमंडळा वतीन एका खास मार्गदर्शन कार्यशाळेचें आयोजन केल्लें. ह्या वेळार मार्गदर्शकां कडेन इतिहासीक तशेंच दायज थळां विशीं गरजेचें गिन्यान आनी म्हायती आशिल्ल्याची खात्री करून घेतली. ह्या इतिहासीक थळांची सर्वोच्च सुरक्षा आनी संवर्धन करपाच्या उद्देशान जी 20 गोंय आनी भारतीय पुरातत्व गोंय परिमंडळा वतीन योग्य जतनाय घेतात. गोंयांतली कला, संस्कृती आनी इतिहासाची म्हायती आनी गिन्यान घेतनाच वैविध्यपूर्ण पर्यटनाचो अणभव मेळचो हे खातीर उत्तर तशेंच दक्षीण गोंयांतल्या म्हत्वाच्या थळांकूय भेटी दिवपाचें नियोजन केलां.
जी 20 प्रतिनिधी भेट दिवपा आशिल्लीं थळां
भारतीय जकात आनी जीएसटी संग्रहालय- पणजी, क्रिश्चन कला संग्रहालय- पोरणें गोंय, श्री विजयादुर्गा मंदीर, ट्रॉपिकल स्पायस प्लांटेशन- फोंडें, पिएदाद चर्च- दिवाडे, श्री सप्तकोटेश्वर मंदीर वाठा, फोंतेन्हास, मळा, साव टोम, पणजी, चर्च चौक, राजभवन, दोनापावल जेटी, रेईश मागूश किल्लो, आग्वाद किल्लो बंदखण संग्रहालय- सिकेरी, कासा फिगेरेदो- लोटली, गोवा चित्र संग्रहालय- बाणावली, कोलवा दर्यादेग, श्री महालसा नारायणी मंदीर- वेर्णे, फाझेना कॅज्युलो लिकर डिस्टिलर्स, उतोड्डें दर्यादेग, तेरेखोल किल्लो आनी श्री मोरजाई मंदीर- मोरजी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
