भांगरभूंय | प्रतिनिधी
दिवचलः 20 मेक दनपारां सावरधाट धनगरवाडींतली संगिता बाबलो शिंगाडी (45) बोकडांक घेवन आमठाणे धरण वाठारांत वडावल गेल्ली. थंय ती उदक पियेवपा खातीर उदकांत देंवली. तेन्ना अचकीत मानग्यान तिचेर हल्लो केलो आनी तिका उदकांत ओडून व्हेली. हे दुर्घटणेंत तिका मरण आयलें.
थंय गेल्ल्या कांय जाणांनी ही म्हयती पुलिशेक दिली. ते उपरांत पुलीस पंगड तशेंच दिवचल उजो पालोवपी दळाचे जवान घडणुकेचे सुवातेचेर येवन संगिताचे कुडीचो सोद घेतलो. ही खबर कळटाच थळावे पंच दिलीप वरक, संजय शेट्ये, पवन बबनराव राणे, तशेंच थळावे लोक घडणुकेचे सुवातेर पावले. शिंपणावळ खात्याचे अधिकारी नरेश पोकळे हांणीय थंय भेट दिली.
दिवचल उजो पालोवपी दळाचे राजन परब, अनील नायक, महेश देसाय, विशाल वांयगणकार, आर. गांवस ह्या जवानांनी बोटीच्या आदारान धरणाच्या उदकांत खूब वेळ मेरेन उदकांत ओडून व्हेल्ले संगिताचो सोद घेतलो. ते उपरांत तांकां संगिताची कूड मेळिल्ल्याचें तांणी सांगलें. दिवचल पुलिसांनी पंचनामो करून कूड पोस्टमार्टमा खातीर धाडली.
मरण आयिल्ले संगिताक तीन भुरगीं आसात. दोन म्हयन्यां आदींच तिच्या घरकाराक मरण आयिल्लें. बोकडां पोसून ती घर संवसार चलयताली. त्या कुटुंबाची अर्थीक स्थिती सामकी वायट आसा. सरकारान तिका मजत मेळोवन दिवची, अशी मागणी झिलू वरक हांणी केल्या. ह्या प्रकरणांत दिवचल पुलीस अदीक तपास करतात.
धरण वाठारांत राखण दिवपाची मागणी
आमठाणे धरणांत सध्या साळांतल्यान पंपींग केल्लें उदक नेमान साठयतात. ताका लागून धरणांत सदांच उदक आसता. धरणाचे दुसरे वटेन लोक बिनधास्त न्हांवपा खातीर वतात. ताका लागून थंय आनीक दुर्घटणा जावपाची भिरांत आसा. ते खातीर ह्या वाठारांत सुरक्षा रक्षक तशेंच राखणे वेवस्था करपाची मागणी थळाव्या लोकांनी केल्या. मजगतीं, ह्या धरण वाठारांत फाटल्या कांय वर्सांत मानग्यान ओडून व्हरपाची ही तिसरी घडणूक. हे आदीं थंय दोगांक मरण आयलां.
सुरक्षा यंत्रणा उबारतलेः डॉ. चंद्रकांत शेट्ये
आमठाणें धरणाचेर बायलेक आयिल्ल्या मरणाचेर आमदार डॉ. चंद्रकांत शेट्ये हांणी दुख्ख उक्तायलां. सरकार दरबारांतल्यान तिच्या कुटुंबाक सगळे तरेची मजत दितले. धरण वाठारांत सुरक्षा यंत्रणा उबारतले. फुडारांत अशे तरेच्यो घडणुको घडच्यो न्हय हे खातीर ताकतिकेन उपाय हातांत घेतले, अशें सध्या अमेरिकेक गेल्ले आमदार डॉ. चंद्रकांत शेट्ये हांणी फोना वयल्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
