भांगरभूंय | प्रतिनिधी
भांगरभूंय । प्रतिनिधी
मुरगांवः देशांतल्या नुस्तेंमाऱ्यांच्यो ज्यो समस्या आसात त्यो सुटाव्यो करपाक पंतप्रधान नरेंद्र मोदी हांणी प्राधान्य दिलां. ते खातीर तांणी नुस्तें वेवसाया खातीर स्वतंत्र मंत्रालय सुरू केलां. नुस्तेमारी वेवसायांत आशिल्ल्यांक तांचो हक्क मेळोवन दिवपाचें काम ह्या विभागा वतीन हातांत घेतलां अशी म्हायती केंद्रीय नुस्तें वेवसाय मंत्री पुरुषोत्तम रुपाला हांणी दिली. केंद्र सरकाराचे मजतीन राज्य सरकारां नुस्तेमार भावां खातीर वावुरतात अशें तांणी सांगलें.
मुरगांव देस्तेरो हांगच्या नुस्तेमारी वेवसायकांच्यो समस्या आयकून त्यो सुटावो करपा खातीर गोंयच्या नुस्तेंमारी खात्या वतीन आयोजीत केल्ले कार्यावळींत रुपाला हाजीर आशिल्ले. तांच्या वांगडा गोंयचें नुस्ते वेवसाय मंत्री नीळकंठ हळर्णकार, मुरगांवचो आमदार संकल्प आमोणकार, वास्कोचो आमदार कृष्णा साळकार, नुस्तेमारी खात्याची संचालक डॉ शर्मिला मान्तेरो आशिल्ली.
नुस्त्या वेवसाय करतात तांची उदरगत जावची हे खातीर पंतप्रधान मोदी हांणी स्वतंत्र मंत्रालय स्थापन केला. राज्य सरकारांक विस्वासांत घेव नुस्ते वेवसायिकांचो समस्या आयकून घेवन त्यो सुटाव्यो करपाक उपाय सोदून काडपाचो यत्न आमी करतले अशें रुपाला हांणी फुडें उलयतना सांगलें. नुस्तें वेवसायिकांच्यो समस्या सुटाव्यो करपाक जाय जाल्यार तांणी सरकाराक पुराय सहकार्य करपाक जाय अशें नीळकंठ हळर्णकारान सांगलें.
देस्तेरो आनी बायणा दर्या देगेर नुस्तें वेवसाय करपी लोकांच्या समस्या विशींचें निवदेन मुरगांवचो आमदार संकल्प आमोणकार हांणी केंद्रीय नुस्ते वेवसाय मंत्र्याक सादर केलें. गोंयचो रांपणकार संघटनेचो फुडारी आलेसियो सिमाईश, वास्को नुस्तें मार्केट समितीची वांगडी रुसलीन डिसोझा, किस्तोद डिसोझा, शौकत हवेरी, साजीद शेख, कामील डायस, बाणावलीचे नुस्तेमार पेले फर्नांडीस हांणी हेरांनी केंद्रीय मंत्र्याक तांका भेश्टायतात त्या समस्यांची म्हायती दिली.
रुपाला हांणी वास्को खारीवाडो हागचे नुस्तेमारी जेटीर वचून थंय आशिल्ल्या सुविधांची पळोवणी केली. तांच्या वांगडा आदले मंत्री जुझे फिलीप डिसोझा आनी नुस्तेमारी वेवसायीक आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
