भांगरभूंय | प्रतिनिधी
भांगरभूंय । प्रतिनिधी
मडगांवः कर्नाटकांतले हारीन गोंयच्या भाजपाक न्हिदेंतल्यान जागें केलां. केंद्रांतल्या भाजप सरकारान कर्नाटकांतल्या कळसा- भंडुरा प्रकल्पाच्या डीपीआराक मंजुरी दिली तरी तो बेकायदेशीर आशिल्ल्याचो साक्षात्कार आतां तांका जाला. व्हो डीपीआर फाटीं घेवपा खातीर केंद्र सरकाराक फोर्सार करात असो सल्लो विरोधी पक्ष फुडारी युरी आलेमांव हाणे राज्य सरकाराक दिला.
गोंयांतल्या भाजप राज्य कार्यकारिणीन मंजूर केल्ल्या राजकी थारावां विशी आलेमांव आनी खर प्रतिक्रिया उक्तायतना गोंयांतलो भाजप जर खऱ्यांनीच गंभीर आसल्यार तांणी डीपीआर केंद्र सरकाराक फाटीं घेवपाक सांगचो. ना जाल्यार तांच्या राजकी थारावांत प्रामाणीकपणा ना हें दिसून येतलें अशें म्हणलां. भाजपा कार्यकारिणीन गोंयातल्यो खणी केन्ना सुरू जातल्यो हाची तारीक कित्याक सांगली ना हाचें कारण दिवचें अशेंय तांणी सांगलां.
मुख्यमंत्रीपदाचें एक वर्स पुराय केल्ले खातीर मुख्यमंत्री डॉ प्रमोद सावंत हांकां परबीं दिवपाच्या भाजप कार्यकारिणीच्या थारावांत अभूतपूर्व जनादेश असो शब्द वापरला. विस्वासघातकी आनी पक्षांतर करपाक उर्बां दिवंन भाजपान जनादेश लुटला अशें आलेमांवान सांगलां. राज्यात नियोजीत जी-20 बसकेच्या उल्लेखा विशीं प्रतिक्रिया दितना 1983 वर्सा आदली पंतप्रधान इंदिरा गांधी हांणी गोंयांत चोगम रिट्रिटाचें आयोजन करून गोंयचे नांव संवसारीक पांवड्यार व्हेलें हें भाजपान यादीत दवोरचें अशें तांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
