भांगरभूंय | प्रतिनिधी
विराट कोहली आनी फाफ ड्यू प्लेसीस हे जोडयेन काल हैदराबादाच्या मैदानाचेर वादळ हाडलें. 187 धांवड्यांचो फाटलाव करतना कोहली आनी प्लेसीस हांणी पयले विकेटी खातीर 172 धांवड्यांची उत्कृश्ट भागिदारी केली आनी सनरायझर्स हैदराबादाची हार निश्चीत केली.
दोगांयनी हैदराबादाची बॉलिंग फोडून काडली आनी हैदराबादाची हार निश्चीत केली.
अंदूंच्या हंगामांत तांणी सगल्यांत चड तिसरी शेंकड्याची भागिदारी पुर्ण केली. अंदूंच्या हंगामांत हे जोडयेन वट्ट 800 धांवड्यो करून चार वर्सां आदलो विक्रम मोडलो. 2019त जॉनी बॅयरस्टो आनी डॅव्हिड वॉर्नर हांणी 10 मॅचींनी 791 धांवड्यो केल्ल्यो. ह्या जैता सयत बंगळुरून गुणतकट्यांत मोठी उडी घेतली आनी प्ले ऑफाचे सर्तींत स्वताक कायम राखलो.
कोहली-ड्युप्लेसीस हांणी उत्कृश्ट सुरवात करून दिली. दोगांयची बॅटींग पळोवपा सारकी आशिल्ली आनी तांचें टायमिंग तोखणाय करपा सारकें आशिल्लें.
भुवनेश्वर कुमारान घाल्ले 15वे ओव्हरींत कोहलीन उत्कृश्ट पुस्तकी शॉर्ट मारून तीन चवके मेळयले आनी पंगडाची धांवसंख्या 150 मेरेन पावयली. कोहली 63 बॉलांनी 100 धांवड्यो करून कॅच बाद जालो. ताणें 12 चवके आनी चार सके मारले. टी-20 क्रिकेटींतलो ताचो हो सातवो शेंकडो थारलो. ताणें रोहित शर्मा आनी लोकेश राहुल (6) हांचो विक्रम मोडलो.
ड्युप्लेसीस 47 बॉलांनी सात चवके आनी दोन सक्यांचे मजतीन 71 धांवड्यांचेर बाद जालो. पूण, तो मेरेन बंगळुरून मॅच आपले वटेन हाडिल्ली. ब्रेसवेल आनी मॅक्सवेल हांणी जैत निश्चीत केलें. रॉयल चॅलेंजर्स बंगळुरून 19.2 ओव्हरींनी 2 विकेटी वगडावन 187 धांवड्यो करून मॅच जिखली.
ते पयलीं हॅन्रीच क्लासेनाच्या शेंकड्या नेटार हैदराबादान 5 विकेटी वगडावन 186 धांवड्यो केल्यो.
क्लासेन आनी अॅडम मार्करम हांणी 76 धांवड्यांची भागिदारी केली. क्लासेनान 51 बॉलांनी 104 धांवड्यो केल्यो. ताणें आठ चवके आनी स सके मारले. हॅरी ब्रुकान नाबाद 27 धांवड्यांची खेळी केली. हैदराबादान 5 विकेटी वगडावन 186 धांवड्यां मेरेन पावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
