भांगरभूंय | प्रतिनिधी
पंजाब किंग्साक इंडियन प्रिमियर लिगेचे (आयपीएल) 64वे मॅचींत दिल्ली कॅपिटल्सा कडल्यान 15 धांवड्यांनी हार घेवची पडली. दिल्ली कॅपिटल्सान दिल्ले 214 धांवड्यांचे मोखीचो फाटलाव करपी पंजाबाक 8 विकेटी वगडावन 198 धांवड्यो करप शक्य जाल्यो.
प्ले ऑफाचे सर्तींत कायम रावपाक पंजाबाक उरिल्ल्यो दोन मॅची जिखप गरजेचें आशिल्लें. पूण, तातूंतली एक मॅच वगडायली. ताका लागून आतां लखनौ सुपर जायण्ट्स आनी रॉयल चॅलेंजर्स बंगळुरू हांचे खातीर काम सोंपें जालें. पंजाबान आपली निमाणी मॅच जिखली तरी ताचे 14 गूण जातले. सध्या गुजरात टायटन्स (18 गूण) प्ले ऑफांत पावला. चेन्नय सुपरकिंग्स आनी लखनौ हांचे दरेकी 15 गुणां सयत पयल्या चारांनी आसात.
पंजाब किंग्साची निमाणी मॅच राजस्थान रॉयल्सा आड जातली. राजस्थान रॉयल्साक प्ले ऑफांत सुवात मेळोवपाक ही मॅच जिखप गरजेची आसा. ताका लागून ही मॅच उमळशीक वाडोवपी थारुये. दुसरे वटेन रॉयल चॅलेंजर्स बंगळुरूच्यो निमाण्यो दोन मॅची सनरायझर्स हैदराबाद आनी गुजरात टायटन्स हांच्या आड जावपाच्यो आसात. बंगळुरू ह्यो दोनूय मॅची जिखल्यार प्ले ऑफाची सर्त उमळशीक वाडोवपी जातली. चेन्नय सुपरकिंग्स आनी लखनौ हांचे दरेकी 15 गूण आसात. चेन्नय सुपरकिंग्स आड दिल्ली कॅपिटल्स आनी लखनौ आड कोलकाता नायटरायडर्स ह्या मॅचींचेर सगलें गणीत निंबून आसा.
रॉयल चॅलेंजर्स बंगळुरू आपल्यो उरिल्ल्यो दोनूय मॅची जिखता आनी मुंबय इंडियन्स आपली निमाणी मॅच जिखता जाल्यार दोगांयचे दरेकी 16 गूण जातले. पूण, चेन्नय सुपरकिंग्स आनी लखनौ सुपर जायण्ट्स हे दोनूय पंगड आपली निमाणी सांखळी मॅची जिखली जाल्यार मुंबय इंडियन्स आनी रॉयल चॅलेंजर्स बंगळुरू हांचे मदीं जाची नेट रन रेट चड आसतली तो प्ले ऑफांत चवथे सुवाते खातीर पात्र थारतलो. मुंबय इंडियन्सान आपली निमाणी मॅच वगडायली आनी बंगळुरून आपल्यो दोनूय मॅची जिखल्यो, जाल्यार बंगळुरू प्ले ऑफांत पावतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
