भांगरभूंय | प्रतिनिधी
कसलेच शिकवणीचो आदार घेनासतना मेळयलें घसघशीत येस
माशेल: सांतईस्तेव टोंकवाड्या वयलो आनी कुजिरा बांबोळे डॉ. केबी हेडगेवार उच्च माध्यमिकांत बारावेच्या विज्ञान फांट्यांत शिकपी दीप राजेंद्र सावंत हाणें 96.6 टक्के गूण मेळोवन गोंयांत पयलो येवपाचो मान मेळयलो. ह्या येसा खातीर ताचें सगली कडेन अभिनंदन जाता.
दीप राजेंद्र सावंत हाचे सुरवातेचें शिशुवाटिकेंतलें शिक्षण सरस्वती शिशुवाटिका जुंवें हांगा जालें. उपरांत पयली ते चौथी मेरेनचें मराठी शिक्षण सरकारी मुळावी शाळा चिमुलवाडो माशेलांत जालें. थंय ताणें पयलो नंबर केन्नाच सोडलो ना. ताची भयण रितीका त्या वेळार डॉ. केबी हेडगेवार हायस्कुलांत शिकताली. ताका लागून ताकाय तेच शाळेंत फुडल्या शिक्षणा खातीर वचचें अशें दिसलें आनी ताणें पांचवेंत थंयच प्रवेश घेतलो. थंय लेगीत तो एक हुशार विद्यार्थी म्हूण नांवरुपाक आयलो. ताणें धावेचे परिक्षेंत 98.16 टक्के गूण मेळयले. पूण कोरोना म्हामारीच्या काळांत ताचे हे घसघशीत येस पड्ड्या आड गेलें.
शालेय शिक्षणा पसून हुशार विद्यार्थी म्हूण ताणें नांव जोडलां. ताका लागून ताचे विशीं आवय-बापायक आनी ताच्या शिक्षकांक बारावेचे परिक्षेंत ताचे कडल्यान खुबूच अपेक्षा आशिल्ल्यो. पूण आवय-बापायन केन्नाच अपेक्षेचो दोंगर ताचेर घालो ना. स्वता दीप हाका बऱ्या मार्कांनी पास जातलो अशें मना पसून दिसतालें. पूण बॉर्डांत पयलो येतलो अशें ताका दिसूंक नाशिल्लें. पूण ताणें अभ्यासा बाबतींत हेर परिक्षे प्रमाण कश्ट घेतिल्ले. एक म्हत्वाची गजाल म्हणल्यार दीप हाणे आपले शिक्षणीक जिणेंत केन्नाच ट्युशन घेतलें ना. तो शाळेंत मन लावन शिक्षकांचें शिकोवप आयतालो आनी घरा येवन ताची वेळावेळार उजळणी करतालो. ताचेंच फळ म्हूण ताका गणीत आनी संस्कृत विशयांत दरेकी 100 गूण मेळ्ळे.
फिजिक्स विशयांत 99 गूण, बायलॉजींत 98 गूण, कॅमेस्ट्रींत 92 गूण मेळ्ळे. ताची शिक्षणीक फांटभूय लेगीत व्हड नाशिल्ली. बापूय राजेंद्र आठवी आनी आवय योगिता इकरावी पास अशी आशिल्ली. तशेंच घरची परिस्थिती हालाकीचीच आशिल्ली. बापूय राजेंद्र हाका पांच वर्सां पयलीं कुंडयचे एके खाजगी कंपनींतल्यान नोकरे वयल्यान कमी केल्लो. ताका लागून आनीक नोकरेचो दुसरो पर्याय उपलब्ध नाशिल्ल्यान परंपरीक नुस्त्याच्या वेवसायांत तो देंवलो आनी नुस्तें मारपा बरोबर स्वताच स्कुटरी वयल्यान नुस्त्याची विक्री करूंक लागलो. दीपाची आवय घराच आसता.
दीप सकाळीं 5.30 वरांचेर उठून शाळेक वचपा खातीर सकाळीं 6.15 वरांची बस धरतालो. आवय-बापायन ताचेर केन्नाच शिक्षणाचें चेपण घालें ना. जेन्ना ताका आपूण गोंयांत बारावेचे परिक्षेंत पयलो आयिल्ल्याचें समजलें त्या वेळार नो नीटचे परिक्षेची तयारी करतालो. ताका नीटचे परिक्षे खातीर आनीक उर्बा मेळ्ळी आनी ताणे अदीक नेटान अभ्यास करून नीटची परिक्षा बरे तरेन दिली, आनी हे परिक्षे विशींच्या निकाला विशीं ताका बऱ्यो अपेक्षा लेगीत आसात.
ताची व्हडली भयण रितीका खांडोळेच्या सरकारी म्हाविद्यालयांत विज्ञान फांट्याच्या निमाण्या वर्सा आसा. तेच बरोबर ताच्या आवय-बापायची इत्सा आसा की तो दोतोर जावचो. आयज मेरेन केन्नाच कोणाचीच मजत घेनासतना म्हज्या दोनूय भुरग्यांनी शिक्षण घेतलां. पूण फुडारांत मॅडिकल कॉलेजीच्या शिक्षणाक चड खर्च आशिल्ल्यान सरकारान फुडल्या शिक्षणा खातीर थोडी अर्थीक तरतूद करीत जाल्यार म्हजे वयलो भार उणो जातलो अशें दीपाचो बापूय राजेंद्र सावंत हाणें आमच्या प्रतिनिधी कडेन उलयतना सांगलें.
दीप आपल्या येसाचे श्रेय ताच्या आवय-बापायक तशेंच माशेलांतल्या सरकारी मुळावे शाळेच्या शिक्षकांक तशेंच डॉ. केबी हेडगेवार हायस्कूल आनी उच्च माध्यमीक हायस्कुलाच्या शिक्षकांक दिता. तांकांच लागून म्हाका ट्युशनाची केन्नाच गरज भासली ना, आनी हेच खातीर हांव येस मेळोवंक शकलो अशी कबुली ताणें दिली.
म्हाका शिक्षणा खातीर खूब कश्ट घेवचे पडले. पूण जर कोणाकूय गरजेवंत विद्यार्थ्याक गणीत वा हेर विशयाची कसलीय अडचण येता आसत जाल्यार हांव तांकां मजत करपाक तयार आसा, आनी म्हज्या आवय-बापायचीय म्हाका तीच शिकवण आसा अशें दीपान ह्या वेळार समाजीक बांदिलकीच्या कर्तव्यांतल्यान स्पश्ट केलें.
एका ल्हान खेड्यांत रावून आनी कसलेच शिकवणेचो आदार घेनासतना, तशेंच घरचे हालाकीचे अर्थीक परिस्थितीचेर मात करून दीपान बारावी विज्ञान फांट्यांत शिकून गोंयांत पयलो येवपाचो मान मेळयलो हे विद्यार्थ्यां खातीर प्रेरणादायी आसा हातूंत कसलोच दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
