भांगरभूंय | प्रतिनिधी
उल्हास तुयेंकारः सुमार 87 कोटींचो खर्च अपेक्षीत, मंजुरी खातीर घेतलों मुख्यमंत्र्यांची भेट
भांगरभूंय । प्रतिनिधी
मडगांवः नावेली मतदारसंघांतल्यो वीज वाहिन्यो भुंगगत पद्दतीन घालपाच्या कामांचो प्रस्ताव धाडिल्लो. 87 कोटी रुपयांचो हो प्रकल्प आसा. ती फायल गोवा स्टेट वर्कस बोर्डा कडेन आसा. ती फुडल्या सप्तकांत बसकेंत मंजुरी खातीर घेतले. ती मंजूर जाले उपरांत निविदा जारी करतले. ही म्हायती नावेलीचे आमदार उल्हास तुयेंकार हांणी दिली. तशेंच हे संबंदांत मुख्यमंत्र्यांची भेट घेतलों, अशेंय तांणी स्पश्ट केलें.
आमदार तुयेंकार हांणी नावेली पंचायत सभाघरांत नावेली मतदारसंघांतल्या सगळ्या पंचांची बसका आपयिल्ली. बसके उपरांत तुयेंकार हांणी सांगलें, नावेली मतदारसंघांत पांच पंचायतींचो आस्पाव आसा. मतदारसंघांतल्या मान्सूनपूर्व कामांचो नियाळ घेवचे खातीर बसका आयोजीत केल्ली. ते खातीर पांचूय पंचायतींचे सरपंच, पंच हाजीर राविल्ले. ते भायर पंचायतींच्यो तशेंच लोकांच्योय कागाळी आयकून घेतल्यो.
गटविकास अधिकाऱ्यां कडेन आशिल्ल्या अभियंत्यां कडेन खूबशीं कामां प्रलंबीत आसात, अशी कागाळ खूबशा पंचायतींनी केली. ताचेर गटविकास अधिकाऱ्यां कडेन चर्चा केल्या. एका अभियंत्या कडेन खूबशीं कामां प्रलंबीत आसल्यार कांय कामांचें वांटप करचें आनी दुसऱ्या अभियंत्या कडेन दिवपाची विनवणी केल्या. नावेली पंचायतींतल्या खूबशा मान्सूनपूर्व कामांच्यो फायली मंजूर जावपाच्यो बाकी आसात. फुडल्या सप्तकांत ते सगळे सोपस्कार पुराय जातले, अशें तुयेंकार हांणी सांगलें.
राष्ट्रीय म्हामार्गाच्या कामांक लागून खूब कडेन गटारांत माती सांचल्या. कंत्राटदारांक तीं गटारां नितळ करपाक सांगलां. नावेली मतदारसंघांतल्या कांय वाठारांनी घाणयारें उदक प्रकल्पाचे पायपलायनीचीं कामां पुराय जाले उपरांत खणिल्ले रस्तें दुरुस्त करतले. पावसाळ्या आदीं तांचेर हॉटमिक्स डांबरीकरण करपाची सुचोवणी केल्या. कांय पंचायत वाठारांत लायटीचे खांबे मोडपाक पावल्यात. ते नवे घालपाची मागणी पंचांनी केल्या. दर पंचायतीक कितले खांबे लागतले ताची वळेरी दिवपाक सांगल्या. ते प्रमाण वीज मंत्र्यां कडेन चर्चा करून तशी मागणी करतले. ते भायर नावेली मतदारसंघाच्या पांचूय पंयात वाठारांतल्या 10 ते 15 कोटींच्या कामांच्यो कांय निविदा जारी केल्यात. मान्सूनपूर्व कामां सुरू जाल्यात. आनीक कसलीं कामां उरल्यांत जाल्यार तीं समजून घेवचे खातीर बसका आपयिल्ली, अशें आमदार तुयेंकार हांणी सांगलें.
‘रस्त्या कुशीक कोयर उडोवं नाकात’
आके बायश पंचायतीन कोयर प्रक्रिया प्रकल्पा खातीर मशिनां आनी गाडीय घेतल्या. रुमडामळ पंचायत कोयर एकठांय करपाचें काम बरे तरेन करता. दवर्ली पंचायती कडल्यान कोयर प्रक्रिया प्रकल्प उबारपाक मातसो कळाव जाला, तरी लेगीत नावेली कोयर मुक्त करपा खातीर यत्न चल्ल्यात. लोकांनी रस्त्या कुशीक कोयर उडोवपाचें बंद करपाची गरज आसा. ते भायर पंचायत मंडळांनीय पंचायती कडल्या निधीचो वापर करून कोयर एकठांय करपाच्या आनी ताचेर प्रक्रिया करपाच्या कामाचेर लक्ष दिलें जाल्यार कोयर समस्या उणी जावपाक शकता, अशें आमदार उल्हास तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
