भांगरभूंय | प्रतिनिधी
भांगरभूंय । प्रतिनिधी
पोरणे गोंयः आझोशी शेताच्या बांदाक पडिल्ले खांवटे अजून बंद करूंक नाशिल्ल्यान शेताचें व्हडा प्रमाणांत लुकसाण जाला. राज्य आपत्ती वेवस्थापन प्राधिकरणांत हातूंत लक्ष घालून खांवटे बंद करपाची मागणी शेतकारांनी केल्या.
हें खांवटे सारकें केले ना जाल्यार पावसाच्या दिसांत आझोशीच्या सकल वाठारांत हुंवार येवपाची भिरांत आम आदमी पक्षाचे फुडारी रामाराव वाघ हांणे उक्तायल्या. कूळ असोसिएशनात हें खांवटें सारकें करपाचो यत्न केलो मात ताकां तातूंत येश मेळ्ळें ना. ताका लागून आपत्ती वेवस्थापन प्राधिकरणांत तातूंत लक्ष घालून पावसा पयलीं खावटें बंद करपाची वेवस्था करची अशें वाघान मागलां.
बांदाची दुरुस्ती पारपरीक पद्दतीन करपाक जाय. मात आधुनीक पद्दतीन दुरुस्तीचें काम सुरु केल्लें तेन्ना ते खातीर हाडिल्ली सामुग्री उदकांच्या नेटान व्हांवून गेली. खांवटें पडून एक म्हयन्यो जायत आयलो तरी तें पुरोवपाचें काम अजून हातांत घेवंक ना अशी म्हायती ताणे दिली.
उदकाच्या प्रेशराक लागून खांवटे रूंद जावपाची चिन्हा सद्या दिसपाक लागल्यांत. एकदां पावसाक सुरवात जाली म्हणटगीर दुरुस्ती करप सामकें कुस्तार जातलें. फुडल्या पंदरा दिसांत संबंदीत अधिकाऱ्यांनी बांदाची दुरुस्ती केली ना जाल्यार शेतकार तिडकतले अशी शिटकावणी वाघ हाणे दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
