भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजीः साहित्य अकादमीचे वांगडी डॉ नरेंद्र पाठक हांचे हस्तुकीं गोमंतक साहित्य सेवक मंडळा वतीन मंगळाराक गजानन देसाय पुरस्कृत ब्रह्मराज देसाय यादस्तीक साहित्य पुरस्कार भेटयले. मयुरेश वाटवे, राजू भि. नायक, दुर्गाकुमार नावती, डॉ गुरुदास नाटेकार, शीतल साळगांवकार आनी ज्ञानेश्वर कोलवेकार (मेल्या उपरांत) हाकां हे साहित्य पुरस्कार फावो जाल्यात. कोलवेकाराचे घरकान्नीन पुरस्कार स्विकारलो.
पुरस्कार मेळल्ल्यांनी कृतज्ञता बाळगुवपाक जाय मात पुरस्कारांत अडकून फुडली वाट बंद पडची ना हाची जाणविकाय दवोरपाक जाय असें डॉ पाठक हांणी सांगलें. म्हायती तंत्रगिन्यान एकवटेन वरदान जाल्यार दुसरे वटेन समस्या थारता. द्वेश पातळावप काय मोग हें माध्यमांनी आनी लेखकांनी थारावपाक जाय. साहित्य चळवळींतल्यान सकारात्मक विचार मांडपाक जाय अशें ताणे सांगलें.
साहित्य सेवक मंडळाक ऍरकंडिशनर भेट म्हणून दिवपी ज्येश्ठ पत्रकार सुरेश वाळवे हाचो ह्या वेळार भोवमान केलो. पुरस्कार फावो जाल्ल्यां वतीन राजू भि नायकान मनोगत उक्तायलें.
कार्यावळी वेळार माचयेर गोमंतक साहित्य सेवक मंडळाचो अध्यक्ष रमेश वंसकार, उपाध्यक्ष विट्ठल गांवक आशिल्ले. गजानन देसाय हांणी कोलमडून वचपाचे अवस्थेंतल्यान आपल्या साहित्यान साल्वार केलें अशें सांगतना कला अकादमी, गोमंतक मराठी अकादमी हाचे पुरस्कार बंद पडिल्ले खातीर खंत उक्तायली. ह्या वेळार डॉ नरेंद्र पाठक हांचे हस्तुकीं गजानन देसाय हांचे दवबिंदू, डॉ गुरुदास नाटेकार हाचे हृदय संवाद आनी विनोद नायक हांच्या अनुभूती अशा तीन पुस्तकाचें प्रकाशन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
