भांगरभूंय | प्रतिनिधी
भांगरभूंय । प्रतिनिधी
पोरणे गोंयः फाटल्या 15 वर्सांत 12 कोटी रुपये खर्च करून लेगीत मंडूर हांगचो पूल अजून पुराय जायना. व्हो पूल बांदपाचो मुळ हेत आतां ना जाला तरी पुलाचें काम मात अजून चालू आसा. शेतकारांक आपल्या शेतांत ट्रॅक्टर घेवन वचपाक मेळचें आनी शेतां रोवपाक उर्बां मेळची हे खातीर हो पूल प्रकल्प गोंय साधन सुविधा उदरगत म्हामंडळान बांदपाक घेतिल्लो.
2008 वर्सा ह्या पूलाच्या बांदकामाक सुरवात केल्ली. मात अजून तें पुराय जायना. पुलाच्या वाठारांत आशिल्ली खाजन शेतां आतां कांदळींनी भरल्यांत. बांद फुटून गेल्ल्यान शेत सध्या खाऱ्या उदकान भरलां आनी थंय शेत लागवड सुरू जावपाची चिन्हा दिसनात. विशेश म्हणल्यार आतां ह्या पुलाची शेतकारांक गरज ना तरी ताचें काम अजून सुरू आसा. सध्या पुलाच्या जोड रस्त्याचें काम चलिल्लें दिसता.
मंडूर पुलाचें बांदकाम म्हणल्यार फकत सरकारी पयश्यांची लूट असो आरोप आम आदमी पक्षाचे फुडारी प्रा. रामाराव वाघ हाणे केला. मुदलांत इतल्या व्हडल्या पूलाची गरजूच नाशिल्ली. ल्हान पूल बांदून शेतकारांक शेतांत ट्रॅक्टर व्हरपाची वेवस्था करून दिवपाक जाताली. पयलीं शेतकार शेतांत वचपा खातीर फूटब्रिजाचो वापर करताले. तका मात्शी घटाय दिल्यार काम जातालें अशें वाघान सांगलें.
पूलाच्या नियोजनांतूच दोश आशिल्लो. 2008 वर्सा जेन्ना पूलाच्या बांदकामाक सुरवात केल्ली तेन्ना ताचो खर्च सुमार 8 कोटी आशिल्लो. उपरांत जोड रस्ते बांदपाक आनीक 4 कोटी सरकारान मंजूर केले. व्हो पूल थारायल्ले वेळांत बांदून पुराय जाल्लो जाल्यार ताचो शेतकारांच्या फायद्याचो थारताशिल्लो अशें रामाराव वाघान सांगलें. खाजन शेतांत आता कांदळीचीं झाडां तयार जाल्ल्यान शेतकारांनी लागवड करप सोडून दिलां आनी पूलाचीय आतां गरज ना.. गोंय साधन सुविधा उदरगत म्हामंडळ आतां फकत पुलाचें बांदकाम पुराय करपाचे सोपस्कार करीत आसा अशे तांणे सांगलें
व्हो पूल जातगीर ते समाजविघातक, गुन्यांवकार आनी हेर गजालीचें केंद्र थारपाची भिरांत वाघ हाणे उक्तायल्या. ह्या पूलाचो समाजविघातक शक्तींक वापर करपाक दिवपाचे सुवातेर ताचो बरो उपेग जावचो हे खातीर सरकारान पर्यायी प्रकल्प उबारपाचो यत्न करपाक जाय अशें वाघान सूचयलां. युको टुरिझमाचो पर्याय ताणे सूचयला. कृशी खात्याक आपणे एक प्रस्ताव सादर करून दोन किलोमीटर वाठारांत युको टुरिझम सुरू करून खाजन शेताची पारंपरीक पद्दती थंय सुरू करपाक सागलां अशी म्हायती ताणे दिली.
सान्तआंद्रेचो आदलो आमदार फ्रान्सिस्को सिल्वेरा गोंय साधन सुविधा उदरगत म्हामंडळाचो उपाध्यक्ष आसतना ह्या पूलाचें बांदकाम सुरू केल्लें. पुला विशीं विचारल्ल्याा प्रस्नांक जाप दिवपाक ताणे न्हयकार दिलो. व्हो पूल बांदपा खातीर ज्या शेतकारांची जमीन घेतिल्ली ताकां अजून नुकसान भरपाय मेळूंक ना. शेतकारांक सुमार एक कोटी रुपये लुकसाण भरपाक अजून सरकारा कडल्यान येणे आसा अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
