भांगरभूंय | प्रतिनिधी
राज्यपाल राज्यपाल श्रीधरन पिल्लय हांणी चोडणां जुंव्याक दिली भेट
पणजी: सैम आनी मनशाचो एकमेकांकडेन घट्ट संबंद आसात, अशें गोंयचे राज्यपाल श्रीधरन पिल्लय हांणी आपली घरकान्न रिता एस पिल्लय हांचे वांगडा चोडणां जुंव्याक दिल्ले भेटी वेळार उलयतना सांगलें.
राज्यपालान डॉ. सलीम अली पक्षी अभयारण्याक दिल्ले भेटीविशीं खोस उक्तायतना सरकाराचो रानां विभाग सैमाचो सांबाळ करपा खातीर सगळे तरेचे यत्न करता, अशें सांगलें.
‘राजभवन हेरिटेज ट्रीज ऑफ गोवा’, ‘वामनवृक्ष कला उद्यान’, ‘गोंयची जुंवी’ ह्या तीन पुस्तकांचें रोखडेच प्रकाशन करतले, अशी म्हायती राज्यपालान ह्या वेळार दिली. गोंय हें पर्यटन केंद्र आशिल्ल्यान अशा पुस्तकांतल्यान पर्यटकांक गोंयच्याविशीं चड म्हायती उपलब्ध जातली.
राज्यपालांच्या भेटी वेळार हाजीर आशिल्लें मयेंचे आमदार प्रेमेंद्र शेट हांणी मयें वाठाराचो हिंटरलॅण्ड पर्यटन थळ म्हणून उदरगत करतले, अशें सांगलें.
राज्यपालान बोटींत बसून मांडवी न्हंये देगेच्या खारफुटींतल्यान भोंवडी करून सैमाचो आनंद घेतलो. उपरांत राज्यपालान चोडणांच्या श्री देवकीकृष्ण भुमिका मल्लिनाथ देवस्थानाक भेट दिवन श्रीचो आशीर्वाद घेतलो. राज्यपालान चोडणाच्या सेंट बार्थोलोम्यू चर्च आनी क्राइस्ट रे क्रॉसाकय भेट दिली.
राज्यपालांचे सचीव एम. आर. एम. राव, आदले सचीव मिहीर वर्धन, आनंद जाधव आनी हेर अधिकारी हे भेटीवेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
