भांगरभूंय | प्रतिनिधी
उदयसिंग राणे: भिंरोडा पंचायत वाठारांतल्या पर्यटन थळांचेर राबयली नितळसाण मोहीम
वाळपय: सैमाकडेन आत्मीयताय आनी आपलेपणाची भावना निर्माण करप गरजेचें. आपल्या वाठारांतल्या सैमाची जतनाय घेवप ही दरेकल्याची जापसालदारकी. भोंवतणच्या सैमाची राखण केल्यार पर्यावरणाची बरे तरेन जतनाय करूं येता. नागरिकांनी रान खात्याक बरे तरेन सहकार्य दिल्यार सैम आनी पर्यावरणाची व्हड प्रमाणांत राखण करूं येता अशें भिरोंडा पंचायतीचे सरपंच उदयसिंह राणे हांणी स्पश्ट केलें.
भिंरोडा पंचायत वाठारांतल्या खुबश्या वाठारांनी आनी खासा करून पर्यटन स्थळांचेर नितळसाण आनी कोयराचो विलो लावपाची मोहीम हातांत घेतली. ताका लागून भिरोंडा वनविभागाच्या कर्मचार्यांचें बरें सहकार्य मेळ्ळें.
ह्या वेळार भिंरोडा विभागाचे वनपरिक्षेत्र अधिकारी संगम गांवस, क्षेत्र अधिकारी लक्ष्मण कांसकार, वन संरक्षक राजेश किनलेंकार, मनोहर गांवकार आनी प्रशांत नायक हाजीर आशिल्ले. तशेंच पंचायतीची उपसरपंच रूपाली गांवकार, विदेश नायक, किरण गावडे, बाबुराव गावडे, मनीषा पिळयेंकार, रंजना राणे आनी हेर हाजीर आशिल्लीं.
ह्या वेळार व्हडा प्रमाणांत कोयर एकठांय केलो.
सरपंच उदयसिंह राणे हांणी सैम आनी पर्यावरणाची राखण करपा खातीर रान खातें सगळे तरेचे यत्न करीत आसा. पूण ते खातीर समाजांतल्या दरेका घटकान सहकार्य करप तितलेंच म्हत्वाचें. दरेकल्याचे जिणेंत पर्यावरणाक खाशेलें म्हत्व आसा. पर्यावरणाची राखण करप दरेकल्याची जापसालदारकी अशें तांणी फुडें म्हणलें.
ह्या वेळार उलयतना रान विभाग अधिकारी संगम गावस हांणी सांगलें, आयज दरेका पंचायत वाठारांतल्यान रान खात्याक बरें सहकार्य मेळटा. ताका लागून आमी सैमाची बरे तरेन सेवा करची. तरणाट्यां मदीं सैमा विशीं मोग निर्माण करप हें आयज तितलेंच म्हत्वाचें. अशें जाल्यार फुडाराक पर्यावरण संरक्षणाचो मंत्र फुडली पिळगी चालीक लावंक शकता. रान खातें खुबश्यो जागृताय मोहीम हातांत घेतात. पूण समाजाचो आदार मेळ्ळे बगर रान खात्याचे यत्न येसस्वी जावचे नात अशें सांगून फुडाराक अशा उपक्रमांक सगळ्यांनी सहकार्य करपाची मागणी तांणी केली.
भिंरोडा पंचायत वाठारांत न्हंयचे देगेर खुबशीं पर्यटन स्थळां आसात. ह्या पर्यटन स्थळांचेर व्हडा प्रमाणांत कोयर पातळिल्लो. हो कोयर हे मोहिमे वरवीं एकठांय केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
