भांगरभूंय | प्रतिनिधी
निर्शेणी हाडपी सुरवाती उपरांत लखनौ सुपर जायण्ट्सान धांवड्यांचो दोंगर उबारलो. जाल्यार दुसरे वटेन 90 धांवड्यांची भागिदारी करून मुंबय इंडियन्सान जबरदस्त सुरवात केल्ली. पूण, उपरांत ताचो डाव गडगडलो. 178 धांवड्यांचो फाटलाव करतना रोहित शर्मा आनी इशान किशन हांणी 9.4 ओव्हरींनी 90 धांवड्यांची भागिदारी केली. पूण, दोगांयच्यो विकेटी पडल्यो आनी सुर्यकुमार यादवान आत्मघातकी शॉर्ट मारून लखनौक विकेट दिली. ताका लागून मुंबय इंडियन्साक सोंपी दिसपी मॅच पळयता पळयता कठीण जाली आनी लखनौन मॅच आपले वटेन घुंवडायली आनी 5 धांवड्यांनी जैत जोडलें.
लखनौच्या रवी बिश्नोईन 10वे ओव्हरींत रोहित शर्मा आनी इशान किशन हांचे मदीं जाल्ली 90 धांवड्यांची भागिदारी फोडली. ताणें रोहिताक बाद केलो. रोहितान 25 बॉलांनी 1 चवको आनी तीन सक्यांचे मजतीन 37 धांवड्यो केल्यो.
बिश्नोईन फुडले ओव्हरींत इशान किशनाक तंबूंत धाडलो. इशानान 39 बॉलांनी 8 चवके आनी 1 सक्याचे मजतीन 59 धांवड्यो केल्यो. मुंबयची भिस्त सुर्यकुमार यादवाचेर आशिल्ली. पूण, यश ठाकूराचे बॉलिंगेचेर सूप शॉर्ट मारपाच्या यत्नांत फकत सात धांवड्यो करून बोल्ड जालो.
सुर्या बाद जाल्या उपरांत लखनौची आस्त मात्शी वाडली. 17वे ओव्हरींत मोहसीन खानान पयल्याच बॉलाचेर नेहल वढेराक (16) बाद केलो. टिम डॅव्हिडाचेर सगली भिस्त आशिल्ली आनी इम्पॅक्ट प्लेयर म्हणून विष्णू विनोदाक मैदानांत धाडलो. फाटले मॅचींत ताणें जबरदस्त बॅटींग केल्ली. यश ठाकूरान 18वे ओव्हरींत विष्णूक (2) बाद केलो. शिमे लागसार निकोलस पुरनान ताची कॅच धरली. मुंबय इंडियन्साक 12 बॉलांनी 30 धांवड्यांची गरज आशिल्ली आनी कॅमेरून ग्रीन आनी डॅव्हिड ही स्फोटक जोडी मैदानांत आशिल्ली.
डॅव्हिडान 19वे ओव्हरीच्या पयल्या तीन बॉलांचेर आठ धांवड्यो केल्यो. तिसरो बॉल फुलटॉस पडलो आनी चवको गेलो. नो बॉल आनी चवको मेळिल्ल्यान मॅच मुंबय वटेन घुंविल्ल्या भशेन दिसली. पूण, ते उपरांत नवीन दोन निर्धाव बॉल घाले. पूण अखेरच्या बॉलाचेर डॅव्हिडान सको मारून 6 बॉल 11 धांवड्यो असो केलो.
मोहसिनाच्या पयल्या तीन बॉलांचेर फकत दोन धांवड्यो आयल्यो. ताका लागून निमाण्या तीन बॉलांचेर 9 धांवड्यांची गरज पडली. फुडल्या बॉलाचेर एकूच धांवडी आयिल्ल्यान अखेरच्या बॉलाचेर आठ धांवड्यांची गरज पडली आनी अखेरेक लखनौन जैत जोडलें. मुंबय इंडियन्साक 5 विकेटी वगडावन 171 धांवड्यो करप शक्य जाल्यो. डॅव्हिड 19 बॉलांनी 32 धांवड्यो करून नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
