भांगरभूंय | प्रतिनिधी
भांगरभूंय । प्रतिनिधी
काणकोणः राजबाग- किदळें हांगा कोंकण रेलमार्गार खासदार निधींतल्यान सुमार 1.3 कोटी रुपया खर्च करून बांदल्ल्या सब-वेचें उक्तावण राज्यसभा खासदार विनय तेंडुलकार हांचे हस्तुकीं फाटल्या सोमाराक जालें. म्हाशिवरातीक मल्लिकार्जुन देवाची पालखी राजभाग दर्या वेळेर व्हरपाक मेळची हे खातीर पालकी रस्त्याची बुन्यादी फातोर तेंडुलकार हांणे बसयलो.
किंदळें हाका निराकार देवळा फाटल्यान पारंपरीक वाटेर व्हो सब-वे तयार केला. दर वर्सा म्हाशिवरातीक मल्लिकार्जुन देवाची पालखी ह्या रस्त्या वयल्यान राजबाग दर्या वेळेर वता. मल्लिकार्जुन देवस्थान समितीन 2019 वर्सा कोंकण रेलमार्गार सब-वे बांदपाची मागणी केल्ली. ते प्रमाण खासदार निधींतल्यान तो बांदला. कोंकण रेल्वे अधिकाऱ्यांक सब-वेची गरज पटोवन दिवंन तशेंच तांच्या नेमा प्रमाण तांका पयशे फारीक करून सब-वेचें काम केलें अशी म्हायती ताणे दिली.
मल्लिकार्जुनाची पालखी राजबाग तारीर व्हरपाक त्रास जाताले. मल्लिकार्जुन पालखी रस्तो बांदून उपरांत ताचे कुशीक पेव्हर्स घालतले अशी म्हायती काणकोणचो नगराध्यक्ष रमाकांत नायक गांवकारान दिली. काणकोणचो आमदार आनी सभापती रमेश तवडकार हांणी धवलखाजन- आगोंदा हांका श्रमधाम येवजणे खाला बेघरां खातीर बांदतात ती घरां विनय तेंडुलकार हांका दाखयलीं.
सब-वे उक्तावण कार्यावळीक काणकोणचो आदलो नगराध्यक्ष महादेव देसाय, पैंगीणची आदली जिल्हो पंचायत वांगडी डॉ पुष्पा अय्या, दिवाकर पागी, लक्ष्मण पागी, भाजपाचो दक्षीण गोंय उपाध्यक्ष महेश नायक, प्रमोद नायक गांवकार आनी रजनीश कोमरपंत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
