भांगरभूंय | प्रतिनिधी
भांगरभूंय । प्रतिनिधी
वास्कोः चिखली पंचायतीचे ग्रामसभेंत घाणयाऱ्या उदकाचेर प्रक्रिया करपी प्रकल्प (एसटीपी) तशेंच व्हाळांत घाणयारें उदक सोडपाच्या प्रकाराक लागून गरमागरम चर्चा जाली. व्हाळांत घाणयारें उदक सोडटात. ताका लागून जळेरां तयार जावन तांचो लोकांक सामको त्रास जाता. उदकास्रोत खात्या वरवी पुराय व्हाळ नितळ करपाची मागणी लोकांनी ग्रामसभेंत केली.
व्हाळा शेजरा मेगा प्रकल्प आनी लोक वसणुको जाल्यात. थंयचें घाणयारें उदक व्हाळांत सोडटात आनी पंचायत मंडळा ताचे आड कसलीच कारवाय करना असें कॅप्टन विरियातो फर्नांडीस हाणे ग्रामसभे उपरांत पत्रकारांक सांगलें. पंचायत मंडळान चिखलीच्या सकयल्या वाठारांत एसटीपी बांदपाचें थारायलां. पंचायत वाठारांत वयल्या सुवातांनी बांदिल्ल्या लोक वसणुकांतल्या घाणयाऱ्या उदकाचेर प्रक्रिया करपाच्या हेतान व्हो प्रकल्प थंय बांदतात. ताचो बाकीच्या लोकांक उपेग जावचो ना अशें ग्रामसभेंत लोकांनी उलोवन दाखयलें. सकयल्या वाठारांत रावतात त्या घरांतले उदक सेप्टिक टांकयेंत सोडटात. वयल्या वाठारांत सिव्हरेज लायन घालतात. थंय एसटीपी बांदल्यार सगळी घाण सकयल्ल्या वाठारांत येतली आनी थंयच्या लोकांक त्रास जातलो ही गजाल लोकांनी पंचायत मंडळाचे नदरेक हाडून दिली.
पंचायत वाठारांतल्या शेत जमनीत कसलेंच बांदकाम करपाक ना हरकत दाखलो दिवचो न्हय. शेत जमीन राखून दवोरपा संबंदीचो थाराव अलिशा परेरान ग्रामसभेंत मांडलो. व्हाळांत जे कोण घाणयारें उदक सोडटात तांचेर कारवाक करपाचें उतर सरपंच कमला प्रसाद यादवान सांगलें. पंचायत मंत्री माविन गुदिन्हो हांच्या सहकार्यान आमकां 5टीपीटी कोयर विलो प्रकल्प मेळ्ळा. तो सुरू जातगीर पंचायत वाठारांतलो कोयराचो प्रश्न सुटावो जातलो. नव्या तंत्रगिन्यानाचेर आदारीत आशिल्ली एसटीपी सुरू जातगीर घाणयाऱ्या उदकाचोय प्रस्न सुटावो जातलो अशें यादवान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
