भांगरभूंय | प्रतिनिधी
भांगरभूंय । प्रतिनिधी
काणकोणः राज शशीभूषण पांडे ऊर्फ स्वामी ऋषिराज हाणे पैंगीण पंचायत वाठारांत वापें- सादोळशें हांगा सुरू केल्लें आश्रमाचें बेकायदेशीर बांदकाम बंद करपाचो आदेश काणकोणचो उपजिल्होधिकारी रमेश गांवकार हाणे सोमाराक ताका दिला. हे संबंदीची नोटीस ताका धाडल्या.
वापें- सादोळशें हांगचे जमनीत बेकायदेशीर बांदकाम करप, झाडां मारप, जमनीचें सपाटीकरण करप, बेकायदेशीरपणान रस्तो तयार करप ही कामां संबंदीत राज शशीभूषण पांडे करीत आसा. विशेश म्हणल्यार पैंगीण पंचायत मंडळा कडल्यान ताणे कसलेच परवाने घेवंक ना. हे संबंदी थळावी पंच वांगडी शिल्पा विपीन प्रभुगांवकार आनी महेश नायक हांणी पंचायत मंडळाचे नदरेक ह्यो गजाली हाडून दिल्या उपरांत ग्रामसभेंत व्हो प्रस्न गाजलो.
सरपंच सविता तवडकार, शिल्पा प्रभुगांवकार आनी महेश नायक आनी पंचायत सचिवान स्वामीन विकत्या घेतिल्ले जमनीची तपासणी केली. ताणे थंय चयलल्ल्या बांदकामां संबंदी ताका नोटीस धाडून जाप दिवपाक सांगलें. मात स्वामीन पंचायत मंडळान दिल्ले मुजती उपरांत नोटिशेक जाप दिली.
कसलेच परवाने नास्तना केल्लें बांदकाम बेगोबेग मोडून उडोवपाक पंचायत मंडळान स्वामीक सांगल्लें. स्वामीन धाडिल्ले नोटिशेची जापेन समाधान जावंक नाशिल्ल्यान बांदकाम सुवातेर दिल्ले लायटीचें आनी उदकाचें कनेक्शन बंद करपा खातीर पंचायत मंडळान संबंदीत खात्याच्या कार्यालयांक पत्रां धाडल्यांत अशें पंच महेश नायक हांणे सांगलें. मात व्हो तथाकथीत स्वामी कोणाचें कांय आयकना. काणकोण मामलेदार आनी उपजिल्होधिकाऱ्यान काणकोण पुलिसांक पत्र धाडून स्वामीच्या अरेरावीची म्हायती तांकां दिल्या.
उपजिल्होधिकारी रमेश गांवकार हाणी काणकोणच्या मामलेदाराक स्वामीन चलयल्ल्या बेकायदेशीर बांदकामाची तपासणी करून आपल्याक अहवाल सादर करपाक सांगिल्लें. तो मेळ्ळ्या उपरांत उपजिल्होधिकाऱ्यान सोमाराक ताका काम बंद करपाचो आदेश दिला. हे संबंदीची फुडली सुनावणी 7 जूनाक उपजिल्होधिकारी कार्यालयांत जातली. वापें हांगच्या दोंगराचेर आशिल्लीं झाडां मारिल्ले खातीर राना खात्यान स्वामीजी आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
