भांगरभूंय | प्रतिनिधी
कर्नाटकांत काँग्रेसीक मेळिल्ल्या कौला उपरांत राष्ट्रीय पावंड्या वयल्या विरोधी फुडाऱ्यां मदीं केन्नाच नाशिल्लो इतलो उत्साह संचारिल्लो दिसता. ममतादिदीच्या बंगालांत आसूं वा शरद पवार हांच्या महाराष्ट्रांतूय हें जैत आपलेंच आशिल्ल्याच्या थाटांत मनोवप सुरू जालां. कर्नाटकांत वट्ट 135 सुवातो जिखून भाजपाक मात दिवन काँग्रेसीन सत्ता हातासले उपरांत देशांतलें राजकी चित्र लागींच्या काळांत बदतलें काय, हाचेर जशी चर्चा जावपाक लागल्या. तेच प्रमाण काँग्रेसीच्या ह्या येसान विरोधकां मदल्या प्रस्तावीत एकचाराक उरफाटो सुरूंग लागपाची भिरांत जायत्या जाणांक दिसपाक लागल्या.
महाराष्ट्रा सारक्या राज्यांत कर्नाटकांतल्या निकालान राजकी चित्र बदलपाक शकतलें अशें तीन विरोधी पक्षांनी गृहीत धरलां तरी थंयच्या एकूण वास्तवाचो विचार केल्यार विरोधकां खातीर चित्र इबाडपाची शक्यताय चड दिसता. कर्नाटकांतल्या घवघवीत येसा उपरांत आतां ती पयलींची निपचीत पडिल्ली काँग्रेस उरूंक ना. ह्या पक्षाचें मोल आतां खूब वाडलां. अशे परिस्थितींत काँग्रेस पक्षा कडेन जुळोवन घेवपाक लागींच्या फुडारांत सर्त लागली जाल्यार ताचें अजाप दिसपाचें कारण ना. विरोधी पक्षांनी एकठांय येवचें, एकवट जावचो आनी भाजपा विरोधांत येता ते लोकसभा वेंचणुकांनी विरोधकांचो मेळून एक एकूच उमेदवार आसचो हे खातीर यत्न जावपाक लागल्यात. महाराष्ट्रांत जाल्यार निकालाच्या दुसऱ्याच दिसा शरद पवार हाणी जालें गेलें सगलें विसरून महाविकास आघाडी अस्तित्वांत उरची हे खातीर बसकाय घेतली. आतां तातूंतल्यान कितें निश्पन्न जातलें हें येवपी काळूच सांगतलो. तरी काँग्रेसीक पयस दवरपाक सोदपी आतां तांचें जैत मनोवपाक लागल्यात. अश्या वेळार काँग्रेसीच पवित्रो आतां कसो आसतलो हाचेरूच विरोधकां मदल्या एकवटाचो फुडार निंबून आसतलो…. आनी एकवटाचो हो मार्ग आतां दिसता तितलो सोंपो आसचो ना.
विरोधी एकचारा खातीर आतां सगल्यांत पयलीं निकश आसतलो, तो म्हणल्यार काँग्रेसीचें फुडारपण स्विकारून तांचे मर्जी प्रमाण जाग्यांचें जावपी वांटप स्विकारपाचो. बरेच प्रादेशीक पक्ष लेगीत काँग्रेसीच्या कर्नाटकांतल्या जैतान बरेच प्रभावीत जाल्ल्याचें चित्र दिसपाक लागलां. एकवट जाल्यार भाजपाक हारोवप शक्य आसा अशें आतां तांकांय दिसपाक लागलां. अशे परिस्थितींत सगले विरोधी पक्ष एकवटा खातीर काँग्रेसीचें पर्यायान राहुल गांधी हाचें नेतृत्व स्विकारपाक तयार जातलो काय, होच लाखामोलांचो प्रस्न आसा. आनी ताची जाप आतांच दिवपाक जावंची ना. मल्लिकार्जुन खरगे काँग्रेसीचे राष्ट्रीय अध्यक्ष आसत, मात ते स्वताच जेन्ना आपल्या हायकमांडाक माननास्तना राहुल गांधी हाचे कडेन बोट दाखयतात तेन्ना तांची काकुळट येवपा सारकी अवस्था लोकां सामकार येता. काँग्रेस आतां आपल्या येसांत हेर पक्षांक वांटेकार करून घेवपाक कितलो मेरेन तयार आसतलो हाचो दुबाव आसलो तरी चडशे विरोधी पक्षांक आतां काँग्रेसूच आपलो आलाशिरो आसा अशें दिसपाक लागलां हातूंत दुबाव ना. अश्या वेळार काँग्रेसीच्या फुडारा खाला एकठांय येवचें पडलें आनी देशा सामकार असो एकाद्रो अजेंडा दवरचो पडटलो की ताचे कडेन आकर्शीत जावन भाजपा विरोधांत मतदान करपाक तांकां प्राधान्य दिवचें पडटले. कर्नाटकांत काँग्रेसीक जें येस मेळ्ळें ताचे फाटलीं कारणा वेगळींच आसात आनी ताचो उहापोह जाला. भाजपाक केंद्रांतल्या सत्तेंतल्यान काडप व्होच अजेंडा दोळ्या सामकार दवरून विरोधक वेंचणुकांक सामकार वतले जाल्यार तांचो कसलोच राजकी लाब जावप कुस्तार आसा. विरोधकां कडेन हे खातीर वेळ सामको उणो आसा हें तांणी मतींत घेवपाक जाय.
कर्नाटकांत जिखलो म्हणटगीर आतां जग जिखलें, असोच तरेचो दावो राजकी फुडारी करपाक लागल्यात. तातूंत ‘उबाठा’ शिवसेनेचे उद्धव ठाकरे, संजय राऊत हांचो आसपाव आसा. कसबा मतदारसंघा उपरांत कर्नाटकांत भाजपाक नेस्तनाबूत केलां आसलें तरी कसबा आनी कर्नाटकांतली परिस्थिती पुराय वेगळी आशिल्ली, हें विसरपाक जायना. तशें पळोवपाक गेल्यार कर्नाटकांत काँग्रेसीचें जैत तशें अपेक्षीतूच आशिल्लें. आतां जैत आनी हार हातूंत फरक कितलो आसतलो हाचीच प्रतिक्षा सगल्यांक आशिल्ली. ज्या फरकान काँग्रेसान भाजपाक कर्नाटकांत हारयलां ताची अपेक्षा मात कोणेंच करूं नाशिल्ली. विरोधी मतां हे फावट अपेक्षे प्रमाण विभागली गेलीं नात आनी हेर कांय गजाली काँग्रेसी खातीर फायद्याच्यो थारल्यो इतलेंच. कर्नाटकांतली भाजपाची मतांची टक्केवारी कमी जाली ना हेंय म्हत्वाचें. अश्या वेळार ह्या निकालांतल्यान एकच संदेश मेळ्ळा. तो म्हणल्यार भाजपाक हारोवप शक्य आसा आनी तातूंतल्यान विरोधक जाय तो बोध घेवन लोकसभा वेंचणुकांक सामकार वतले जाल्यार एकूण चित्र बदलपाकूय शकतले.
विरोधकां मदल्या एकवटाचें सपन फकत प्रादेशीक पक्षांक एके माचयेर हाडले म्हूण प्रत्यक्षांत येवचें ना. ते खातीर चड व्यापक विचार करचो पडटलो. कर्नाटक निकाला उपरांत फाटल्या दोन दिसांत विरोधी फुडाऱ्यां मदी दिसपाक लागिल्ली उमेद जायत्या जाणांक खोसदिणी आसा. मात लोकसभे खातीर मतदान करतना मतदार वेगळो विचार करतात, हें हाचें पयलीं आमी अणभवलां. मागीर ते खातीर मतदारांचें समादान जावचें हे खातीर जाय तो विकल्प तांच्या सामकार दवरप ही काळाची गरज.
प्रधानमंत्री पदा खातीर विरोधकां मदले कोण कोण दावेदार आसात हाचें चित्र देशा सामकार हाचे पयलीं आयलां तरी एकवटा खातीर फुडाकार घेतना ताचेर मतैक्य जावप खूब म्हत्वाचें. तशें जाल्यार एकवटाची गाडी कांय प्रमाणांत फुडें सरकपाक मजत जातली. नितीशकुमारजी आपले परीन देशभर सद्या ते खातीर यात्रा करत आसात. महाराष्ट्रांत ‘उबाठा’ शिवसेना फुडाऱ्यांनी तांची हालींच भेट घेतली. कर्नाटकांतल्या निकालान एकूण समीकरणां बदल्ल्यांत वा बदलपाचे वाटेर आसात अशें म्हणपाक बरोच आदार आसा. न्यायालयान थाकाय दिल्यार राहुल गांधी लेगीत प्रधानमंत्रीपदाचे सर्तींत आसतले. आनी ते खातीर काँग्रेस जिवाचें रान करतली हातूंत दुबाव ना. एकूण चित्र बदलपाचें आसल्यार विरोधकांक लागींच्या काळांत खूब धांवाधांव करची पडटली. कर्नाटकांत सरकार बदल्लें म्हणल्यार भाजप विरोधांत वातावरण वा हवा तयार जावपाक लागल्या असो समज करून घेवन आपसूक सगळो बदल जातलो ह्या भ्रमांत कोणूय रावल्यार तो फुगो फुटपाचो धोको चड आसतलो.
कर्नाटकान इतलेंच दाखोवन दिलां की काँग्रेसीक भायर दवरून विरोधकां मदीं एकचार जावपाकूच शकना. काँग्रेस आतां चड आक्रमक आनी अवास्तव जाग्यां खातीर आग्रही जावपाक शकतली. विरोधी एकवटा खातीर आतां काँग्रेसीनूच फुडाकार घेवप अपरिहार्य थारता आनी त्या कामाक हेर विरोधी पक्ष तांकां कितलें मेरेन सहकार्य दितात, हाचेरूच एकूण राजकी चित्र बदलतलें काय ना, ह्या प्रस्नाची जाप मेळटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
