फरारी दुबाविताक अटक, पांच दिसांची पुलीस कोठडी

भांगरभूंय | प्रतिनिधी

मुरगांवः वास्को पुलिशेच्या दोळ्यार हात काडून फरार जाल्ल्या दुबावीत चोराक परतून धरपाक पुलिशेक येस आयलें. आयतारा 14 मेक ताका चिखली वाठारांतल्यान अटक केली. फरार जाल्ल्या दुबावितान आपलें नांव पी. रमेश आशिल्ल्याचें पुलिसांक सांगलें. पूण आयतारा पुलिसांनी ताची परतून चवकशी केली तेन्ना ताचें नांव रवी सुभाराव आशिल्ल्याचें मुखार आयलें, अशी म्हायती कपील नायक हांणी दिली. दुबावीत पी. रमेश ह्या नांवान भोंवतालो, अशेंय चवकशेंत उक्तें जालें, अशे नायक हांणी सांगलें.

वास्को पुलिशे कडल्यान मेळिल्ले म्हायती प्रमाण 23 फेब्रुवारीक वास्को पार्क केल्ले चारचाकीचो हारसो फोडून रवी सुभाराव भितरले अडेज लाख रुपया घेवन फरार जाल्लो. ते चोरयेच्या प्रकरणांत पुलिसांनी गुन्यांव नोंद करून रवी सुभाराव हाचो सोद घेताले. ज्या मनशाचे चारचाकींतल्यान पयशे चोरयेक गेल्ले ताचेच मजतीन 27 एप्रीलाक पुलिसांनी रवी सुभाराव हाका अटक केल्ली. त्याच दिसा सांजेच्या 7.30 वरांच्या सुमाराक रवी सुभारावाक वैजकी तपासणे खातीर चिखलेच्या उपजिल्होधिकारी हॉस्पिटलांत धाडिल्लो. थंयच्यान ताका एक्स रे काडचे खातीर बांबोळे गोमॅकाँत धाडिल्लो. त्या वेळार रवी सुभारावाचेर पाळत दवरचे खातीर वास्को पुलीस स्टेशना वयले दोन पुलीस शिपाय आशिल्ले. हॉस्पिटलांत रवी सुभारावाची तपासणी प्रक्रिया चालू आसतना 28 एप्रीलाक फांतोडेर 3 वरांच्या सुमाराक ताणें ताचेर पाळत दवरचे खातीर धाडिल्ल्या दोनूय पुलीस शिपायांच्या दोळ्यांर हात काडून फरार जालो.

अटक केल्लो दुबावीत सुभाराव पुलिशेच्या ताब्यांतल्यान हॉस्पिटलांतल्यान फरार जाल्ल्याची म्हायती उक्ती जाताच ताचो सोद घेवचे खातीर पुलिसांनी लूक आवट नोटीस जारी करून ताचो सोद घेवपाक सुरवात केली. तशेंच पाळत दवरचे खातीर धाडिल्ल्या त्या दोन पुलीस शिपायांच्या ताब्यांतल्यान सुभाराव फरार जाल्ल्यान दक्षीण गोंय पुलीस अधिक्षकान कारवाय करून पुलीस शिपायांक निलंबीत केल्ले.

मजगतीं, फरार दुबावीत तामीळनाडूंत आशिल्ल्याची सुलूस पुलिशेक लागली. तशेंच उपरांत तो बेळगांव मार्गान गोंयांत येता अशीय खबर मेळ्ळी. ते उपरांत पुलिसांनी सांपळो रचलो आनी चिखली पावताच पुलिसांनी ताका ताब्यांत घेतलो. रवी सुभारावाक सोमारा 15 मेक न्यायालयांत हाजीर करून पांच दिसांचे पुलीस कोठडेंत घेतलो. कपील नायक हांच्या मार्गदर्शना खाला अदीक तपास चालू आसा.