भांगरभूंय | प्रतिनिधी
नुस्त्यां मार्केटांतल्या विक्रेत्यांची शिटकावणीः मुरगांव नगराध्यक्षाक घेराव घालून विचारलो जाब
भांगरभूंय । प्रतिनिधी
मुरगांवः खारीवाडो वास्कोच्या ठोक नुस्तें विक्रेत्यांचेर तशेंच रस्त्याचे कुशीक म्हत्वाच्या सुवातांचेर बसून नुस्तें विकपी लमाणी नुस्तें विक्रेत्यांचो वेवसाय नेटान चल्ला. ताचो परिणाम नुस्त्यां मार्केटांतल्या नुस्तें विक्रेत्यांच्या वेवसायाचेर जाता. तशेंच पालिका मुख्याधिकारी आनी नगराध्यक्ष हांणी नुस्त्यां मार्केटांतल्या नुस्तें विक्रेत्यांक दिल्लें उतर पाळूंक नाशिल्ल्यान नुस्त्यां मार्केटांतल्या नुस्तें विक्रेत्या बायलांनी सोमारा 15 मेक परतून पालिकेंत वचून नगराध्यक्षांक घेराव घालून जाव विचारलो. तशेंच ठोक नुस्तें विक्रेते आनी रस्त्याचे कुशीक बसून नुस्तें विक्री करपी लमाणी बायलांचेर कारवाय केली ना जाल्यार पालिके मुखार नुस्तें विक्री करपाची शिटकावणी नुस्त्यां मार्केटांतल्या नुस्तें विक्रेत्या बायलांनी नगराध्यक्षांक दिली.
नुस्त्यां मार्केटांतल्यो नुस्तें विक्रेत्यो बायलो आनी ठोक नुस्तें विक्रेते तशेंच रस्त्या कुशीक म्हत्वाच्या सुवातांचेर बसून नुस्तें विक्री करपी लमाणी नुस्तें विक्रेत्यां मदले शीतयुद्ध अजून सोंपना. वास्कोंतलो नियोजीत नुस्तें मार्केट प्रकल्प जावपाक कळाव जालो तो ह्या नुस्तें विक्रेत्यांक लागून. कारण फाटलो 10 वर्सां परस अदीक काळ चलिल्ल्या ह्या शीतयुद्धाचेर पूर्णविराम लावपाचो खूबशा राजकारण्यांनी यत्न केलो. पूण तातूंत तांकां येस येवंक ना. खंयच्या ना खंयच्या कारणाक लागून ह्या कामांत खो पडलो आनी नुस्त्यां मार्केट प्रकल्पाच्या कामाक आडखळ येत रावली. खारीवाड्या वयल्या ठोक नुस्तें विक्रेत्यांक लागून आमच्या वेवसायाचेर परिणाम जाता. तशेंच रस्त्याचे कुशीक म्हत्वाच्या सुवातांचेर बसून नुस्तें विक्री करपी लमाणी नुस्तें विक्रेत्यांचोय उपद्रव वाडत आसा. ह्या दोनूय विक्रेत्यांचेर कारवाय करात आनी तांचो वेवसाय बंद करात तेन्नाच नुस्त्यां मार्केट प्रकल्पाक हात घालात. ना जाल्यार आमी हो प्रकल्प जावपाक दिवचे नात, असोय नेटाचो आगरो नुस्त्यां मार्केटांतल्या नुस्तें विकपी बायलांनी लावन धरलो आनी प्रकल्पाचें काम आडखळत रावलें.
फाटले विधानसभा वेंचणुकेचे फाटभुंयेर हें नाटक खूब रंगलें आनी परतून ह्या प्रस्नाक रंग चडलो. वेंचून आयिल्ले नवनिर्वाचीत आमदार कृष्णा साळकार हांणी केल्ले शिश्टायेक येस मेळ्ळें आनी ह्या प्रस्नाचेर उपाय काडपाक तांणी सुरवात केली. तांणी नुस्तें विक्रेत्यां मदीं, ठोक नुस्तें विक्रेत्यां मदीं समझोता घडोवन हाडपाचो यत्न केलो. मात तांकां जाय तितले येस मेळूंक ना. नुस्तें विक्रेत्यांचे मागणे प्रमाण आमदार साळकार आनी पालिका मुख्याधिकारी, नगराध्यक्षांनी ठोक नुस्तें विक्रेते आनी लमाणी नुस्तें विक्रेत्यांचेर पुलीस कारवाय करून तांचो वेवसाय बंद केलो. ते प्रमाण नुस्त्यां मार्केटांतल्यो नुस्तें विक्रेत्यो बायलो मार्केट प्रकल्पाच्या कामाक सुरवात करपाक तयार जाल्यो. ते प्रमाण तांकां थंयच्या देव दामोदर ट्रस्टाचे सुवातेंत उबारिल्ले तात्पुरते शेडींत स्थलांतरीत केलें.
मजगतीं, खारीवाड्या वयले ठोक नुस्तें विक्रेत्यांनी आपलो वेवसाय परतून सुरू केल्ल्यान थंय दिसान दीस गिरायकांची गर्दी वाडपाक लागली. तेचवरी लमाणी नुस्तें विक्रेत्यांनीय परतून रस्त्याचे कुशीक आपलो वेवसाय सुरू केलो. तांच्या ह्या उपद्रवाक लागून नुस्त्यां मार्केटांतल्या वेवसायाचेर परिणाम जाता असो दावो करून सोमारा नुस्त्यां मार्केटांतल्यो बायलो पालिकेंत एकठांय जाल्यो. नगराध्यक्ष लियो रॉड्रिगीज आपलें उतर पाळिना हे खातीर तांणी नाराजी उक्तायली. तांणी खारीवाड्यार ठोक नुस्तें विक्रेत्यांनी चलयिल्ल्या वेवसाया विशीं पुराय म्हायती नगराध्यक्षांक दिली. ह्या वेळार नगराध्यक्ष रॉड्रिगीज हांणी आपूण पुलिशे वतीन हे संबंदांत कारवाय करून तांचो वेवसाय बंद करपाचें उतर नुस्त्यां मार्केटांतल्या नुस्तें विक्रेत्या बायलांक दिलें. ह्या वेळार नुस्त्यां विक्रेत्या बायलांनी परतून शिटकावणी दितना सांगलें, जर तांचेर कारवाय केली ना जाल्यार पालिके मुखार बसून आमी नुस्तें विकतलीं.
10 वर्सां सावन प्रस्न पडून
10 वर्सांच्या कार्यकाळांत ह्या प्रस्नांत विक्रेत्यां मदीं आनी पालिका तशेंच संबंदीत अधिकाऱ्यां मदीं खूबश्यो बसका जाल्यो. तातूंत समझोता करपाचो यत्न केलो. पूण कांयच जावंक ना. ह्या कामांत समझोता घडोवन हाडपाक कोणाकूच येस मेळूंक ना. पुलिसांक, राजकारण्यांक तशेंच पालिका मंडळ अधिकाऱ्यांक लेगीत नुस्तें विक्रेत्यां मुखार दिमी मारची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
