भांगरभूंय | प्रतिनिधी
भांगरभूंय । प्रतिनिधी
म्हापशेंः पोंबुर्फा हांगच्या वखदी गुण आशिल्ल्या सैमीक वझऱ्याचें स्वयं शाश्वत मॉडेलच्या माध्यमांतल्यान नूतनीकरण करपाचें आस्वासन पर्यटन मंत्री रोहन खवंटे हाणे दिलां.सोमारा सांजे तांणी हळदोणचो आमदार अॅड कार्लुस फेरेरा आनी पोंबुर्फा-ओळावली पंचायत मंडळा वांगडा वझऱ्याची पळोवणी केली. नूतनीकरणाचो प्रस्ताप पंचायत मंडळान पास करून पर्यटन खात्याक धाडपाची सूचोवणी खवंटेन ह्या वेळार केली.
ह्या वझऱ्याच्या वाठाराचें 2010 वर्सा पर्यटन उदरगत म्हामंडळा वतीन सोबितीकरण केल्लें. मात ते उपरांत देखभाल नाशिल्ल्यान वझऱ्याची अवतिकाय जाली. ती पळोवपाक खवंटे सोमारा थंय गेल्लो. बार्देश तालुक्यां सयत हेर कडले लोक हे वखदी गुणांच्या वझऱ्यां कडेन लोक न्हांवपाक येतात.माक थंय पार्किंगी, शौचालयांची वेवस्था आसना.. ल्हान भुरग्यां खातीर आशिल्ल्या गार्डनांत खेळणी इबाडल्यांत. थंय बसपाक बांक ना अशें लोकांनी खवंटेचे नदरेक हाडून दिले.
पोंबुर्फा वझऱ्याचे सोबितीकरण केल्लें. मात उपरांत ताचे कडेन आडनदर जाली. वझऱ्या कडेन येवपी लोकांनी जापसालदारेन वागपाक जाय. थंय ज्यो किदें सुदारणा करपाक जाय त्यो थळाव्या आमदारा कडेन चर्चा करून करतले. ते खातीर फुडल्या म्हयन्या मेरेन निविदा काडपाचें उतर खवंटेन दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
