भांगरभूंय | प्रतिनिधी
भांगरभूंय । प्रतिनिधी
फोंडेंः कुर्टी- खांडेपार पंचायतीच्या सरपंचपदार संजना सुदेश नायक हिची सोमाराक बिनविरोध निवड जाली. सरपंच वेंचून काडपा खातीर आयोजीत केल्ले पंचायत मंडळाचे खाशेले बसकेक 6 पंच वागंडी हाजीर आशिल्ले. फाटल्या 9 म्हयन्यां उपरांत पंचायत वाठारांतल्या लोकांचेर दुसरो सरपंच पळोवपाची वेळ आयली. संजना नायकाच्या रुपान कुर्टी पंचायतीचेर भाजपाचो बावटो हुबल्ल्यान पक्षाचे वावुरपी मात समाधान उक्तायतात.
नावेद तहसीलदार हाचे आड 6 पंच वांगड्यांनी अविस्वास थाराव हाडून ताका ,सरपंचपदा वयल्यान काडून उडयल्ल्यान हें पद रिकामें जाल्लें. सोमाराक जाल्ले सरपंचाचे बिनविरोध निवडी वेळार उपसरपंच विल्मा परेरा आनी हेर पंच वांगडी हाजीर आशिल्ले.
कुर्टी- खांडेपार पंचायतीच्या फाटल्या मंडळाचे कारकिर्दींत वट्ट 8 सरपंच लोकांक पळोवपाक मेळिल्ले. हाचे फुडें लेगीत ताचीच पुनरावृत्ती जातली अशी चर्चा सोमाराक पंचायत वाठारांत सुरू आशिल्ली. फाटल्या पांच वर्सांत आठ जाण सरपंच जाल्ले. सरपंचपदाचो व्हो खेळ असोच सुरू उरतलो अशें दिसता.
.पंचायत वाठारांत उदरगतीचीं जीं काम पडून आसात तीं चालीक लावपाचो यत्न आपूण करतली. मंसंडभूंय आनी रस्त्यांचो प्रस्न तडेक लावपाचें काम पंच वांगड्यांच्या सहकार्यान करतलें अशें सरपंच म्हणून निवड जाल्या उपरांत संजना नायकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
