भांगरभूंय | प्रतिनिधी
भांगरभूंय । खबरां मेज
पणजीः लोकांक सुरक्षिततायेची खात्री दिवन गोंय आपत्ती प्रतिबंद राज्य करपा खातीर सरकार जाय ती तयारी आनी उपाय येवजण करता अशें मुख्यमंत्री डॉ. प्रमोद सावंत हांणी सोमाराक गोंय राज्य आपत्ती वेवस्थापन प्राधिकरणाच्या बसकेंत येणावळ मंत्री बाबूश मोन्सेरात हांचे उपस्थितीत संबंदीत सरकारी अधिकाऱ्यांची केल्ले पावसा पयलीचे तयारेच्या कामांचो नियाळ घेतना सांगलें
गोंय दर्यादेग वाठारांतलें राज्य आशिल्यान सैमीक तशेंच असैमीक अशा दोनीय तरेच्या आपत्तीक तोंड दिवचें पडटा . ते खातीर पावसाच्या दिसांनी कसलेच आपत्तीक तोंड दिवपाची तयारी आनी उपाय करपाची गरज आसता अशें मुख्यमंत्र्यांनी सांगलें.
सैमिक आपत्ती आडावप आमच्या हातांत नासलें तरी अशा आपत्तीची शक्यताय मतींद दवोरून जाय ते उपाय करून जीवित आनी मालमत्तेचें लुकसाण कमी करप शक्य आसा. हालींच्या तेंपार राज्यांत कांय कडेन चक्रीवादळ आनी हुंवार येवपाच्यो घडणूको जाल्यात. तशेंच उद्देगीक आनी आनी हेर आस्थापनांनी उजो लागपाच्यो घडणूको घडल्यात. आमची जाय तशी तयारी आशिल्ल्यान उजो लागपाचे आपत्तीचेर नियंत्रण दवरप आमकां शक्य जालें. आपत्तीचो धोको लक्षात घेवन आमी सादूरताय बाळगूपा वांगडाच योग्य नियंत्रण उपाय करपा खातीर सगळ्यां संबंधीत यंत्रणांमदी योग्य समन्वय आनी सहकार्याची गरज आसा, अशें मुख्यमंत्र्यान सांगलें.
पावसाच्या दिसांनी सैमीक आनी हेर आपत्तीचेर नियंत्रण दवरपा खातीर लोकांचेय सहकार्य म्हत्वाचें आसा. उजो पालोवपी दलाच्या आनी आपत्कालीन सेवां अधिकाऱ्यांनी प्रशिक्षित आपदा इश्ट आनी आपदा इश्टिणी नियुक्ती करपाची सूचोवणी मुख्यमंत्र्यान केली. पावसाच्या दिसांनी धामीच्या दुयेंसांचेर नियंत्रण दवोरपा खातीर भलायकी सेवा विभागान जाय ती उपाय करपाचीय सुचोवणी मुख्यमंत्र्यान केली.
येणावळ मंत्री बाबूश मोन्सेरात, मुख्य सचीव पुनीतकुमार गोयल, महसूल सचीव संदिप जॅकिस, उत्तर गोंय जिल्हाधिकारी श्रीमती. मामू हागे, म्हायती आनी प्रसिद्धी खात्याचे संचालक दीपक बांदेकार, उदकास्त्रोत खात्याचे मुख्य अभियंता प्रमोद बदामी; तट राखण दलाचे अधिकारी कमांडन्ट आशिष खोसला, बांदकाम खातें, राष्ट्रीय आपत्ती बचाव दल आनी हेर विभागांचे अधिकारी बसकेक हाजीर आशिल्ले
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
