भांगरभूंय | प्रतिनिधी
नूर मुहम्मद: जमात-उल-मुस्लिमीन हातवाडा समिती वतीन भुरग्यांचो भोवमान
वाळपय : कुराण शिकप आनी दिसपट्टे जिणेंत ताचें आचरण करप हें जिणेच्या सगळ्या मळार येस मेळोवपाची कळ. इस्लाम शांतताय, मोग, भावपण असो उपदेश करता जाल्यार कुराण आमकां इस्लामाच्या तत्वांक पाळो दिवन समृध्द जीण जगपाक शिकयता अशें मौलाना नूर मुहम्मद हांणी म्हणलें.
जमात-उल-मुस्लिमीन, हातवाडा वाळपय हांचे वतीन शेनवारा जश्न-ए-हदिया कार्यावळीचें आयोजन केल्लें. ह्या वेळार मुफ्ती नूर मोहम्मद उलयताले. मुफ्ती इनायत शेख हांचे हाजेरींत मुखेल सोयरे मौलाना कयामुद्दीन हांचे हस्तुकीं पवित्र कुराणचें पठण पुराय करपी बारा विद्यार्थ्यांचो भोवमान केलो. मौलाना एमडी सैफुल्ला, मौलाना खिजर मन्यार, शराफत हुसेन, अध्यक्ष दाऊद खान, उपाध्यक्ष असगर खान आनी हेर ह्या वेळार हाजीर आशिल्ले.
महंमद पैगंबराचीं तत्वां आमचे जिणेंत आत्मसात करपाची गरज आसा. कुराण वाचन आनी इस्लामाचे पांच स्थंभांक पुरायपणान पाळो दिल्यार बरें चरित्र दिसून येतलें, अशें मौलाना नूर हांणी फुडें सांगलें.
नेमान अशे तरेच्यो कार्यावळी घडोवन हाडप गरजेचें. धर्म सगळ्यांक गरजेचो. दरेकल्याक धर्माविशीं आत्मसम्मान आनी अभिमान बाळगूंक जाय. हेर धर्मांची निंदा करचे परस आमच्या धर्माची शिकवण आमच्या भावां मदीं पातळावपा खातीर अशे तरेचे उपक्रम घडोवन हाडप खूब गरजेचें. फुडाराक अशे तरेच्या कार्यावळींतल्यान धर्मीक अभिमानी नागरिकांची विचारसरणी विकसीत करपाचो यत्न करचो अशी मागणी मौलाना नूर मुहम्मद हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
